Były palitviazień Ryhor Kijko pamior 3 kastryčnika ŭ 10 kliničnaj bolnicy ad ankalahičnaj chvaroby. Pra śmierć mastaka paviedamiła hramadzkaja aktyvistka Halina Siŭčyk.
«Dziadźka Ryhor — heta byŭ adzin z tych sapraŭdnych frontaŭcaŭ, u kaho maładafrontaŭcy paprostu vučylisia, — kaža Pavał Sieviaryniec. — Jon adzin ź pieršych biełaruskich palitviaźniaŭ. U 1997 hodzie jon padčas Dnia Voli adbivaŭ bieł-čyrvona-bieły ściah u milicyi. Milicyja vychoplivała ściahi, łamała ich, kidała na darohu. Jon adbivaŭ bieł-čyrvona-bieły ściah i za heta byŭ zatrymany razam ź niekalkimi ŭdzielnikami, paśla siadzieŭ try miesiacy ŭ «Vaładarcy» i adbyŭ dva hady «chimii».
U Kurapatach jon taksama prosta biasstrašna išoŭ z hołymi rukami na AMAP, kali sprabavali łamać kryžy i budavać kalcavuju darohu praz Kurapaty. Jon byŭ adzin z tych, chto abaraniaŭ saboj hetyja kryžy, i jaho tam vielmi mocna źbili, jon trapiŭ u špital paśla hetaha.
U Biełarusi takija ludzi — redkaść. Aproč hetaha, jon cudoŭny mastak-kieramist, aproč hetaha, jon vychavaŭ dźviuch vydatnych, talenavitych dačok, vypusknicaŭ Akademii mastactvaŭ. I heta adzin z tych ludziej, na jakich biełaruski ruch trymajecca, adzin z tych ludziej, chto daje prykład.
Ja jak viernik vieru, što Ryhoru Ivanaviču ciapier lepiej, čym było tut na ziamli, bo jon vielmi mučyŭsia, bo ŭ jaho była takaja chvaroba, ankalohija — heta pakutlivaja reč. Ja vieru, što ŭ tym śviecie jamu lepiej, čym było ŭ hetym».
Staršynia Biełaruskaha sajuzu mastakoŭ Ryhor Sitnica zhadvaje, što bačyŭsia z Ryhoram Kijko tydzień tamu.
«Jon užo byŭ mocna chvory. Na vialiki žal, hetaja chvaroba ciahnułasia ŭžo amal dva hady. Jon jak moh, hetak ź joj zmahaŭsia. A ŭ žyćci byŭ vielmi sumlenny, vielmi charošy čałaviek. My znalisia ź im sa studenctva. Ryhor byŭ zaŭsiody prychilnikam biełaruskich nacyjanalnych kaštoŭnaściaŭ i śviatyniaŭ i ŭsialak, jak moh, hetym śviatyniam słužyŭ. Niezdarma jon byŭ u składzie supołki «Pahonia» Biełaruskaha sajuzu mastakoŭ, jakaja i vyznaje hetyja kaštoŭnaści. Aproč usiaho, jon vielmi byŭ aktyŭny jak hramadzianin, i za svaju hramadzianskuju pazycyju jon u svoj čas paciarpieŭ i zaznaŭ pieraśled, u tym liku i sudovy. Ale jon hodna praz usio heta prajšoŭ i zaŭsiody zastavaŭsia vielmi ščyrym, sumlennym i śvietłym čałaviekam, mastakom i nastaŭnikam. Jon šmat vykładaŭ va Ŭniversytecie kultury, jaho vielmi pavažali. I tamu, kaniečnie, heta jašče adna strata i charošaha čałavieka, i mastaka, i ščyraha biełarusa».
***
Ryhor Kijko naradziŭsia 27 červienia 1951 hodu ŭ vioscy Całujkava Łuhanskaj vobłaści va Ŭkrainie. Paźniej siamja pierajechała ŭ Babrujsk. Kijko skončyŭ Biełaruski teatralna-mastacki instytut. Byŭ mastakom-kieramistam, uvachodziŭ u supołku «Pahonia».
U Biełaruskim Narodnym Froncie ad momantu ŭtvareńnia ruchu i partyi. Paśla raskołu BNF u 1999 hodzie — siabra KCHP-BNF.
Pieršy raz Ryhor Kijko byŭ źniavoleny ŭviesnu 1996 hodu. Jaho zatrymali praź niekalki dzion paśla Čarnobylskaha šlachu padčas pikietu ŭ padtrymku zatrymanych na akcyi ŭkraincaŭ. Pikiet byŭ žorstka razahnany. Ryhor Kijko atrymaŭ cialesnyja paškodžańni. Jaho asudzili na 8 sutak.
23 sakavika 1997 hodu Ryhora Kijko zatrymali padčas śviatkavańnia Dnia Voli, abvinavacili ŭ chulihanstvie i try miesiacy trymali ŭ turmie na Vaładarskaha. U vyniku jon atrymaŭ dva hady «chimii».
U 2001 hodzie Ryhor Kijko ŭdzielničaŭ u akcyjach pa abaronie Kurapataŭ suprać pašyreńnia Mienskaj kalcavoj darohi.
8 listapada 2001 hodu padčas napadu specnazaŭcaŭ na lahier abaroncaŭ Kurapataŭ Ryhor Kijko byŭ mocna źbity.
