Hrybniki prynosiać pieravažna vialikija biełyja hryby. Maładych lezie ŭsio mienš.
Ale pačalisia zialonki — kaštoŭnyja vosieńskija hryby. Zialonki, ci zielanicy, marynujuć. Jany nadajucca taksama na supy i žaranku. Ich taksama sioleta unikalna šmat. Uvohule, hod nadzvyčaj uradžajny na hryby.
«Malcy!!! Siońnia pajechaŭ nibyta za baravikami! Nu, znajšoŭ paru, dziasiatak padasinavikaŭ… Jak napaŭ na zialonki!!!! Mama rodnaja!!! Źbiraŭ niekali zialonki, pa 5, 10, nu 15 štuk… Bačyŭ! Ale, kab stolki! Choć trymier z saboj biary! Košyk, u jaki lezie 2,5 viadra — poŭny! Ledźvie dapior da mašyny! Ja dumaju, što siońnia, za maje 59 hadoŭ, ja sabraŭ stolki, što pieravažyć toje, što sabranaje mnoju za ŭsio žyćcio šmatkroć!» — napisaŭ nam naš čytač Uładzimir Skrabatun z Hłybokaha.
Zamarynavać zialonki možna takim čynam:
- Zialonki, sol, vocat, pa 2 ziarniaty hvaździku, čornaha piercu haroškam, duchmianaha piercu, pa 1 łaŭrovym liście na kožny litrovy słoik hryboŭ.
Zialonki zalić na 3–4 hadziny mocna salonaj chałodnaj vadoj dla adździaleńnia piasku, dobra pamyć u niekalkich vodach, davieści da kipieńnia. Pieršuju vadu źlić, znoŭ zalić chałodnaj vadoj i varyć prykładna 40 chvilin. Hryby hatovyja, kali apuściacca na dno. Pasalić tak, kab advar byŭ mocna salony (zvyčajna hryby solacca z raźliku 1 stałovaja łyžka bujnoj soli na 1 ł advaranych hryboŭ).
Prasterylizavać słoiki nad paraj. Słoik treba trymać nad paraj stolki, kab jon spačatku zapacieŭ, a potym vysach. Lepš vykarystoŭvać litrovyja słoiki. Prasterylizavać kryški, prakipiaciŭšy ich.
Na dno kožnaha słoika pakłaści prypravy, ulić 1 stałovuju łyžku vocatu, zapoŭnić słoiki haračymi hrybami i zakatać. Zachoŭvać banki ŭ prachałodnym miescy.
Kansiervavańnie hryboŭ na zimu — składanaja zadača. Kali niedalić vocatu, jość niebiaśpieka raźvićcia ŭ słoiku śmiarotnaha batulizmu, jaki raźvivajecca biez dostupu kisłarodu ŭ kansiervavanych praduktach. Kali pieralić, hryby traciać smak. Lepiej užyvać marynavanyja hryby śviežymi, biez zakatki.
