Inicyjatary kursaŭ biełaruskaj movy «Mova ci kava» pad ehidaj kampanii «Zrobim lepš!» Asamblei niedziaržaŭnych demakratyčnych arhanizacyj (NDA) zapuścili ŭ Minsku i rehijonach Biełarusi prajekt «Navučy siabra razmaŭlać pa-biełarusku».
Padrabiaznaja infarmacyja pra start novaj inicyjatyvy apublikavana na staronkach «Mova ci kava» ŭ sacyjalnych sietkach: facebook.com/movacikavai vk.com/movacikava.
Jak paviedamlajecca, prajekt skiravany na «pieraadoleńnie strachu, psichałahičnych barjeraŭ, papularyzacyju idei razmaŭlać pa-biełarusku i depalityzacyju moŭnaha pytańnia».
«Usim achvotnym i nieabyjakavym prapanoŭjecca ŭziać šefstva choć by nad adnym svaim ruskamoŭnym siabram i navučyć jaho razmaŭlać pa-biełarusku, — adznačajuć aŭtary prajekta. — Heta moža być, naprykład, vaš dobry znajomy ci siabar dziacinstva, brat, siastra, baćka, babula ci čałaviek, jakoha vy sustreli ŭčora ŭ tralejbusie i jaki nie maje ničoha ahulnaha ź biełaruščynaj. Čałaviek, jaki vyvučyŭ biełaruskuju movu, adkryvaje dla siabie novy śviet: novuju muzyku, novyja knihi, novy kruh znosin».
Usich, chto vyrašyć paŭdzielničać, aŭtary prajekta prosiać paviedamić svoj paštovy adras, na jaki buduć vysłany tematyčnyja naklejki i inšaja pradukcyja. «Navučyć movie — sprava niaprostaja. Mienavita tamu «Mova ci kava» padrychtavała śpiecyjalnuju pradukcyju, słoŭniki i karysnyja spasyłki, jakija spatrebiacca padčas navučańnia», — dadali arhanizatary prajekta.
Akramia taho, u miežach hetaj inicyjatyvy startuje konkurs historyj — aŭtary prajekta prapanoŭvajuć usim achvotnym napisać, jak jany «pryjšli da biełaruščyny» ci «dapamahli znajomym ci svajakam zahavaryć pa-biełarusku». Usich udzielnikaŭ čakajuć firmiennyja majki ad «Mova ci kava», aŭtary ž «samych cikavych, śmiešnych i daścipnych tekstaŭ» stanuć uładalnikami fłeš-kartak, biełaruskich knih i dyskaŭ z muzykaj biełaruskich vykanaŭcaŭ. Teksty nieabchodna publikavać na staronkach «Mova ci kava» ŭ sacyjalnych sietkach Facebook i «UKantakcie».
