Sajuz jurydyčnych asob «Respublikanskaja kanfiederacyja pradprymalnictva» (RKP) prosić urad terminova sklikać pasiadžeńnie hramadska-kansultacyjnaha i ekśpiertnaha savieta pry Ministerstvie pramysłovaści, kab razam ź biźnies-sajuzami abmierkavać prajekt ukaza prezidenta, jaki praduhledžvaje ŭviadzieńnie ŭ Biełarusi instytuta śpiecimparciora.
Listy z takoj prośbaj 20 červienia byli nakiravany ŭ adras premjer-ministra Michaiła Miaśnikoviča, vice-premjera Uładzimira Siamaški i ministra pramysłovaści Dźmitryja Kaciaryniča, paviedamiŭ na bryfinhu ŭ Minsku staršynia prezidyuma RKP Uładzimir Karahin.
Nahadajem, 18 červienia stała viadoma, što ŭ Biełarusi padrychtavany prajekt ukaza prezidenta «Ab zabieśpiačeńni Respubliki Biełaruś niekatorymi impartnymi tavarami», jaki praduhledžvaje ŭviadzieńnie instytuta śpiecimparciora mnohich tavaraŭ.
Va ŭradzie takuju mieru tłumačać nieabchodnaściu abarony intaresaŭ dziaržavy. Zhodna z prajektam ukaza z 1 lipienia 2014 hoda da 1 studzienia 2015 hoda dziaržavie pieradajecca vyklučnaje prava na ažyćciaŭleńnie impartu šerahu tavaraŭ: radyjo-, tele-, videa- i bytavoj techniki, padšypnikaŭ, ruchavikoŭ, sielhastechniki, hruzavych aŭtamabilaŭ, stankoŭ, uboračnaj techniki, liftaŭ, šyn i inšych.
Miarkujecca, što ŭ nazvany pieryjad vyklučnaje prava na impart takich tavaraŭ buduć mieć 12 dziaržpradpryjemstvaŭ, a mienavita: Minski padšypnikavy zavod, «Homsielmaš», MZOR, «Biełšyna», Minski matorny zavod, «Mahiloŭliftmaš», «Intehrał», «Atłant», «Haryzont», MTZ, MAZ i Minski elektratechničny zavod imia Kazłova.
Nastupstvy ad dziejańniaŭ hetaha ŭkaza, ličać pradstaŭniki biźniesu, buduć «vielmi niehatyŭnyja nie tolki dla pradprymalnictva, ale i dla nasielnictva i ekanomiki krainy ŭ cełym». U RKP prapanoŭvajuć daručyć «adpaviednym słužbam» padrychtavać da pasiadžeńnia hramadskaha savieta «zaklučeńnie ab ekanamičnych, palityčnych i pravavych nastupstvach takoha rašeńnia», a taksama zaprasić na pasiadžeńnie kiraŭnikoŭ pradpryjemstvaŭ, jakija, jak miarkujecca, atrymajuć vyklučnyja pravy na impart.
U tym varyjancie, jaki staŭ dastupny hramadskaści, prajekt ukaza ŭjaŭlaje saboj «syry dakumient», ličyć Karahin. Prajekt, na jaho dumku, «vypadaje z łohiki» adnosinaŭ, jakaja «vybudoŭvałasia pamiž tryma krainami» — Biełaruśsiu, Rasijaj i Kazachstanam.
Kali ŭkaz budzie pryniaty ŭ takim vyhladzie, heta «adabjecca na biźnies-rejtynhu krainy i adpudzić ad Biełarusi inviestaraŭ», pierakanany staršynia prezidyuma RKP.
