Biełaruś pry padtrymcy Jeŭrasajuza źniščyć 3,4 młn procipiachotnych fuhasnych min (PFM). Pra heta było zajaŭlena 27 maja ŭ Rečycy (Homielskaja vobłaść), dzie adbyłasia cyrymonija adkryćcia Centra pa ŭtylizacyi procipiachotnych min. Hety prajekt finansavaŭsia Jeŭrapiejskaj kamisijaj, na jaho realizacyju było vydzielena 4 młn jeŭra. Usie zapasy buduć źniščanyja na praciahu 20 miesiacaŭ.
Realizacyja prajekta pačałasia vosieńniu 2007 hoda. Štodnia ŭ centry ŭtylizacyi min budzie źniščacca 8 tys. bojeprypasaŭ, vyrablenych 30 hadoŭ tamu. Miny buduć źniščanyja z vykarystańniem technałohii «chałodnaj detanacyi» — źniščeńnie pry dapamozie zaradaŭ u braniakamiery.
Na cyrymonii adkryćcia centra prysutničali pradstaŭniki Ministerstva abarony Biełarusi, Jeŭrapiejskaj kamisii, kiraŭnik pradstaŭnictva ES u Biełarusi Majra Mora, pradstaŭniki ispanskaj kampanii «Ekspał».
Namieśnik ministra abarony pa ŭzbrajeńni Ihar Łaciankoŭ nazvaŭ adkryćcio centra «znakavaj padziejaj». Jon dadaŭ, što tut ustanoŭlena abstalavańnie novaha pakaleńnia. Pavodle jaho słoŭ, realizacyja hetaha prajekta dazvolić utylizavać usie procipiachotnyja miny typu PFM, poŭnaściu vykanać dadzienyja Biełaruśsiu mižnarodnyja abaviazacielstvy ŭ halinie ŭtylizacyi procipiachotnych min.
Na cyrymonii adkryćcia taksama vystupiŭ dyrektar departamienta pa pytańniach susiedstva Hienieralnaha dyrektarata Jeŭrapiejskaj kamisii pa pytańniach raźvićcia i supracoŭnictva Michael Kioler. Jon nahadaŭ, što Biełaruś ratyfikavała Ataŭskuju kanviencyju ab zabaronie ŭžyvańnia zapasaŭ i vytvorčaści procipiachotnych min i ich źniščeńnia.
«Biełaruś, jak kraina, jakaja padpisała hetuju kanviencyju, žadaje, kab my žyli ŭ śviecie bieź min. Min u śviecie ŭsio jašče zastajecca vielmi šmat. Jany ŭjaŭlajuć pahrozu ŭ roznych aśpiektach dla miru i biaśpieki. Mienavita tamu ES i Biełaruś vyrašyli likvidavać usie zapasy min typu PFM. My źniščajem miny — my ŭmacoŭvajem davier», — padkreśliŭ Kioler. Na jaho dumku, takija vidy min nie pavinny isnavać u cyvilizavanym śviecie.
Pavodle słoŭ dyrektara, z momantu padpisańnia kanviencyi ŭ 1999 hodzie ŭ śviecie było źniščana 50 młn min. Anałahičny biełaruskamu prajekt płanujecca realizavać va Ukrainie.
Pavodle słoŭ staršyni savieta dyrektaraŭ kampanii «Ekspał» Francyska Tarente, abjekt pa likvidacyi bojeprypasaŭ źjaŭlajecca sapraŭdy navatarskim i pieršaprachodnickim. «Hety prajekt byŭ vialikim vyklikam dla nas, tamu my raniej nie źniščali miny takoha typu, ale my damahlisia pośpiechu», — skazaŭ jon.
Abstalavańnie i technałohii na novym abjekcie pierasoŭnyja. I paśla zaviaršeńnia prajekta jany mohuć vykarystoŭvacca ŭ inšych miescach Biełarusi i ŭ inšych krainach.
