«Hazprom» 13 maja vystavić Naftahazu papiaredni košt za červień, Ukraina pavinna apłacić jaho da 2 červienia.
Pra heta paviedamiŭ staršynia praŭleńnia AAT «Hazprom» Alaksiej Miler.
«Hazprom» vystavić rachunak «Naftahazu» užo 13 maja i budzie čakać jaho apłaty da 2 červienia ŭklučna, a ŭ vypadku niepastupleńnia srodkaŭ užo z 10.00 msk 3 červienia pastaŭki Ukrainie buduć spynienyja», — zajaviŭ kiraŭnik rasijskaha chołdynhu Alaksiej Miler na sustrečy z premjer-ministram RF Dźmitryjem Miadźviedzievym.
Miadźviedzieŭ ličyć, što Ukrainu treba pieravodzić na papiaredniuju apłatu hazu.
«Ja voś što liču: para spyniać niańčycca, paviedamicie im i z zaŭtrašniaha dnia ŭvodźcie papiaredniuju apłatu. Ja dumaju, što ŭsie mahčymyja sposaby ŭrehulavać hetuju situacyju inšym sposabam byli «Hazpromam» pradpryniatyja, ale nas nie čujuć. A raz heta tak, to treba pačynać ŭžo dziejničać, dalej tryvać prosta niemahčyma», — skazaŭ Miadźviedzieŭ.
U Maskvie śćviardžajuć, što zapazyčanaść Ukrainy za haz uzrasła da $3,5 młrd. Miler zajaviŭ, što 13 maja «Hazprom» vystavić Ukrainie papiaredni rachunak na apłatu hazu ŭ červieni ŭ adpaviednaści z kantraktam.
«Ukraina da 2 červienia z ulikam taho, što 1 červienia — heta niadziela, pavinna budzie apłacić červieńskija pastaŭki. U tym vypadku, kali Ukraina nie apłačvaje hetyja pastaŭki, to «Hazprom» da 10-j ranicy 3 červienia paviedamlaje ŭkrainskamu boku ab tym, jaki abjom hazu budzie pastaŭleny ŭ adpaviednaści ź pieradapłataj. Kali pieradapłaty nie pastupić, to, adpaviedna, va Ukrainu ŭ červieni miesiacy budzie pastaŭleny nul kuboŭ», — skazaŭ Miler.
