Aficyjny Miensk rychtujecca da čempijanatu śvietu pa chakiei z šajbaj. Rychtujecca jak da vajenna-palicejskaj apieracyi
Užo toje, što čempijanat pačynajecca 9 traŭnia, pra niešta dy kaža. Ale bolš cikava było čytać paviedamleńnie pra toje, što nieba nad Mienskam padčas praviadzieńnia ČS-2014 buduć patrulavać bajavyja viertaloty i źniščalniki. Jak toj kazaŭ, dla poŭnaha kamplektu nie chapaje tankaŭ i bronietransparcioraŭ na skryžavańniach vulic dy bajavych kateraŭ na Śvisłačy.
Stvarajecca ŭražańnie, što na Biełaruś niechta źbirajecca napaści, bo ŭ čas čempijanatu, jak nas infarmujuć, aktyŭna buduć vykarystoŭvacca taksama samaloty dalokaha radyjołakacyjnaha vyjaŭleńnia. Hetymi samalocikami dapamohuć Vajenna-pavietranym siłam Biełarusi VPS Rasii.
Učora, za miesiac da čempijanatu, prajšło admysłovaje pasiadžeńnie Rady biaśpieki. Kurtacieńkuju infarmacyju pra hetaje pasiadžeńnie dało kazionnaje Biełaruskaje telehrafnaje ahienctva.
Samo saboj, udzielniki pasiadžeńnia abmiarkoŭvali, jak «harantavać biaśpieku ŭdzielnikaŭ i haściej». Ale hałoŭnaje, jak zajaviŭ Łukašenka i jak pieradaje BiełTA, — «nie dapuścić nijakich pravakacyj».
Što majecca na ŭvazie pad słovam «pravakacyi», my, biełarusy, dobra viedajem. Heta značyć nie dapuścić nijakich aktaŭ pratestu suprać dyktatury, suprać padparadkavańnia nacyjanalnych intaresaŭ Biełarusi intaresam Kramla i da t.p.
Kali ja štości razumieju pra hety režym, dyk ź lohka mahu pradkazać, što apazicyjnaje demakratyčnaje pole Biełarusi pierad pačatkam čempijanatu čakaje vialikaja začystka. Rychtujucca praskrypcyi. Nie vyklučaju, što praskrypcyi ŭžo składzieny, što idzie tolki ich dapaŭnieńnie i ŭdakładnieńnie.
Chapun pačniecca da pryjezdu aficyjnych zamiežnych delehacyj i žurnalistaŭ, bo pierad «orhanami» pastaŭlena zadača «zrabić tak, kab hetyja miery biaśpieki… nie kidalisia ŭ vočy» ŭdzielnikam i haściam spabornictvaŭ, a taksama žurnalistam.
Znoŭ apazicyjaniery-demakraty buduć maciukacca, znoŭ buduć razmachvać rukami, vykrykvać antyprezidenckija łozunhi, chapacca za huziki i pahony doblesnych achoŭnikaŭ paradku… Nie vyklučaju, što ŭ hetyja dni ŭžo idzie vučoba budučych chapalnikaŭ, dajucca im indyvidualnyja ŭstanoŭki, idzie padrychtoŭka pamiaškańniaŭ, u jakich buduć utrymlivacca aryštanty. Nu, i asabliva aktyŭnaja AHP ŭžo maje prablemy ź Ministerstvam justycyi.
