U centry Kijeva kala kaviarni «Mafija» byli paranienyja try čałavieki, paviedamiŭ ministr unutranych spraŭ Arsien Avakaŭ na staroncy ŭ Facebook.
«Niechta Orest z «Pravaha siektara», pa śviedčańni vidavočcaŭ, adkryŭ stralbu. Paraniena troje — dvoje ciažka. Siarod paranienych — dvoje bajcoŭ Samaabarony Majdanu, namieśnik kiraŭnika Kijeŭharministracyi Bohdan Dubas», — napisaŭ Avakaŭ.
Pavodle jaho słoŭ, pryčyny stralby nieviadomyja.
«Toj, chto stralaŭ, byŭ zabłakavany ŭ prybiralni kafe inšymi aktyvistami. Da prybyćcia milicyi ŭ kafe prybyli z hatela «Dniapro» ciažka ŭzbrojenyja pradstaŭniki Pravaha siektara, vyvieli strałka praz utvorany kalidor i kanvajavali ŭ hatel «Dniapro», — cytuje ministra «Siehodnia».
Jon taksama napisaŭ, što daŭ kamandu zatrymać vinavatych. «Što pavinien rabić ministr? Pravilna — addaŭ kamandu błakavać bandfarmiravańni. Zatrymać vinavatych. Usie siłavyja atrady pryviedzieny ŭ stan bajavoj hatoŭnaści.
Taki moj abaviazak — tak dyktuje zakon. A zaŭtra — zaŭtra ja hatovy i da adstaŭki, i da dalejšaj baraćby. Adzin suprać ich — hatovy, budzie nas bolš — hut. Usiamu jość miaža i ŭsiamu byvaje čas jasnaści! Pracuju», — napisaŭ Avakaŭ.
Jak paviedamiła žurnalist Michajlina Skoryk na svajoj staroncy ŭ Facebook, zaraz vyśviatlajuć asobu strałka. «Pa słovach sotnika 11-j sotni Anatola Viadmiedzia, kanflikt z Pravym siektaram adbyŭsia «z-za pytańnia razboru namiotaŭ, pytańnia razboru barykadaŭ». Streły prahučali z bajavoha pistaleta», — napisała jana.