Amierykanski piśmieńnik, navukoviec i sacyjołah Čarlz Miurej u artykule dla The Wall Street Journal daje piać paradaŭ maładym ludziam, jakija imknucca da ščaślivaha žyćcia, napoŭnienaha hłybokim adčuvańniem sensu i zadavalnieńnia. Jany padobnyja na «prapisnyja iściny» — adnak, kaža Miurej, vopyt pakazvaje, što mienavita jany vychodziać na pieršy płan, kali havorka zachodzić pra ščaślivaje žyćcio ŭ cełym.
1. Padumajcie pra rańni šlub
U naš čas, asabliva na Zachadzie, uzrost zaklučeńnia pieršaha šlubu daŭno pierasiahnuŭ miažu ŭ 30 hod. Adnak Miurej prapanuje zadumacca pra pieravahi rańnich šlubaŭ. Heta, viadoma, nie značyć, što vy pavinny stavić sabie zadaču abaviazkova vyjści zamuž u 23 ci ažanicca ŭ 25 — bo reč u pieršuju čarhu ŭ tym, kab sustreć taho samaha, adzinaha čałavieka. Prosta šlub, zaklučany paśla 30, chutčej za usio budzie padobny na «źlićcio». Kali ž abodvum jašče pa 20 ź niečym, to jon, vierahodna, stanie «startapam».
U šlubie-«źlićci» niama ničoha drennaha: abodva partniory ŭžo stałyja, z dobraj adukacyjaj, karjernaj pierśpiektyvaj i sfarmiravanymi pohladami na žyćcio, jany dobra ujaŭlajuć, čaho chočuć ad šlubu, i naŭrad ci buduć škadavać, što nie paśpieli «nahulacca» ŭ maładości.
Plusy ž šlubu-«startapu» ŭ tym, što ŭvieś šlach stanaŭleńnia vy projdziecie razam, i ŭspaminy pra hetyja časy buduć biascennymi. U vas źjavicca vielmi kaštoŭnaja reč — sumiesny vopyt. A razam ź im — śviadomaść taho, što biez svajho sužonka vy nie stali b tym, kim vy jość zaraz. Mienavita ŭ šlubach-«startapach» najčaściej naradžajecca toj svojeasablivy simbijoz, kali dvoje — heta niešta bolšaje, čym prosta suma indyvidualnaściaŭ.
2. Znajdzicie rodnasnuju dušu
Čarhovaja banalnaść nakont šlubu, ale ad taho nie mienš praŭdzivaja: abirać u spadarožniki žyćcia lepš čałavieka, ź jakim u vas supadajuć husty i pohlady. Niastrašna, kali vy lubicie balet, a kachany — nie; kali ž vam abodvum nie padabajucca siabry «druhoj pałovy», ci vy nie razumiejecie pačućcio humaru adno adnaho — heta ŭžo pryčyna zadumacca.
Hałoŭnaje ž, kab supadali pohlady na try asnoŭnyja punkty, što majuć upłyŭ na paŭsiadzionnaje žyćcio: punktualnaść, staŭleńnie da paradku i bieražlivaść.
Kali niešta ŭ partniory vas razdražniaje, nie dumajcie, što paśla šlubu jon źmienicca. Tak, jon moža źmianicca — ale časta zusim nie ŭ toj bok, pra jaki vy mierkavali. Hałoŭnaje — heta toje, što vam sapraŭdy ŭ partniory padabajecca. Kali dziela hetaha vy hatovyja mirycca ź niedachopami — prosta prykryjcie na ich vočy i prymajcie čałavieka takim, jakim jon jość.
Mnohija ščaślivyja pary na pytańnie pra sakret udałaha šlubu adkazvajuć: «My nie prosta muž i žonka, my lepšyja siabry». Mienavita tamu tak važna z adkaznaściu padyści da pošuku «rodnasnaj dušy». Bo ščaślivy šlub, na dumku Miureja — heta lepšaje, što moža zdarycca z vami ŭ žyćci.
3. Pierastańcie chvalavacca pra słavu i bahaćcie
U 20 hod amal kožny z nas maryć pra słavu, bahaćcie albo toje i druhoje razam. Heta całkam narmalna; naadvarot, nienarmalna tłumić zdarovyja ambicyi i admaŭlacca ad žadańnia iści ŭśled za marami.
Kali ž vam užo 40, vy lubicie svaju pracu, znajšli rodnasnuju dušu, hadujecie paru cudoŭnych dzietak — i raptam uśviedamlajecie, što naŭrad ci ŭžo kali staniecie bahatym albo viadomym — varta źmianić junackija ambicyi na stałaje razumieńnie. Słava i bahaćcie robiać dobruju reč — lakujuć ambicyjnuju tryvožnaść. Adnak heta — daloka nie samaje važnaje ŭ žyćci.
4. Usprymajcie relihiju ŭsurjoz
Kali vy źjaŭlajeciesia stałym paśladoŭnikam niejkaj relihijnaj tradycyi, možacie prapuścić hety punkt.
Kali ž vy vyraśli ŭ ateistyčnym asiarodździ, albo ŭpeŭnienyja, što sučasnamu čałavieku hetaja łuchta ŭžo daŭno niepatrebnaja — pasprabujcie ŭsio ž pastavicca da relihii z bolšaj dolaj pavahi. Pačnicie vyvučać jaje.
Nie treba čakać azareńniaŭ, bo čytańnie relihijnaj litaratury — heta sapraŭdnaja praca, časam nie vielmi lehkaja. Adnak navat samyja zaciatyja ahnostyki i ateisty mohuć być mocna ździŭlenyja, kali pabačać, jakuju hłybiniu dumki i šmatviekavoj mudraści mohuć prapanavać vučeńni chryścijanstva i budyzmu, daasizmu i induizmu. Abiarycie toje, što vam bližej i cikaviej. Hetaje čytańnie nie abaviazkova pryviadzie vas da viery — adnak biassprečna zrobić bolš udumlivym i schilić da peŭnych razvažańniaŭ, što z časam adabjecca na jakaści žyćcia ŭ lepšy bok.
5. Pierahladajcie «Dzień surka»
Film «Dzień surka» byŭ źniaty bolš za 20 hod tamu, ale i siońnia nie hublaje aktualnaści. Heta vydatnaja, pa-majstersku vytančana zroblenaja prytča pra asnoŭnyja maralnyja kaštoŭnaści i šlach da ščaścia. Biez zališniaha maralizatarstva film pakazvaje pieratvareńnie hałoŭnaha hieroja — televiadučaha Fiła, jakoha ŭvasablaje hienijalny Bił Miurej — u całkam realizavanuju čałaviečuju istotu, u asobu, jakaja navučyłasia adčuvać hłybokaje zadavalnieńnie ad žyćcia, choć joj na heta byŭ dadzieny ŭsiaho adzin dzień. Jaki, praŭda, paŭtaraŭsia znoŭ, znoŭ i znoŭ dziasiatki razoŭ.
Tyja ž samyja iściny vykładzienyja i ŭ «Etycy» Arystotela, adnak pahladzieć «Dzień surka» — našmat viesialej.
