Istotnyja źmieny pry pakarańni pjanych kiroŭcaŭ ahučyŭ polski premjer-ministr Donald Tusk na admysłova sabranaj pres-kanfierencyi 7 studzienia.
Tak, kiroŭca, jakoha ŭpieršyniu złoviać za rulom u stanie ałkaholnaha apjanieńnia, stracić prava na kiravańnie aŭtamabilem na termin ad 3 da 15 hadoŭ. Zatrymany taksama pavinien budzie zapłacić štraf ad 1600 da 35000 dalaraŭ.
Kali ž kiroŭca budzie zatrymany pjanym dvojčy, jon moža pazbavicca paśviedčańnia na 5-15 hadoŭ dy zapłacić štraf ad 3300 dalaraŭ. Proźviščy ŭsich parušalnikaŭ buduć ahučvacca ŭ ŚMI. Kiroŭca, jaki ŭ stanie ałkaholnaha apjanieńnia spravakuje avaryju sa śmiarotnym vynikam ci kalectvam, budzie pažyćciova pazbaŭleny prava kiravać mašynaj.
– Toj, kaho złavili druhi raz za rulom u stanie ałkaholnaha apjanieńnia, niachaj rychtujecca da žorstkaha pazbaŭleńnia voli, – dadaŭ premjer-ministr.
Pa jaho słovach, z 2015 hoda ŭ kožnym polskim aŭtamabili pavinien budzie znachodzicca ałkatestar.
Jak karajuć pjanych kiroŭcaŭ u inšych krainach?
Bielhija (dapuščalny ŭzrovień ałkaholu ŭ kryvi kiroŭcy - 0,5 pramile)
Kali ŭ kiroŭcy vyjavili ŭzrovień ałkaholu 0,5 - 0,8 pramile, jon pavinien budzie zapłacić štraf ad 137 da 2750 jeŭra. Čym bolš ałkaholu, tym bolšy štraf - pakarańnie moža dachodzić i da 11 tysiač jeŭra.
Kitaj (dapuščalny ŭzrovień ałkaholu - 0,02 pramile)
U pjanaha kiroŭcy mohuć adabrać paśviedčańnie na šeść miesiacaŭ, a ŭ vypadku recydyvu - navat na termin da piaci hadoŭ. U 2009 hodzie, padčas kampanii suprać pjanych kiroŭcaŭ, sud u horadzie Chienhd prysudziŭ na śmierć kiroŭcu, jaki na pjanuju hałavu zabiŭ čatyroch čałaviek. Praŭda, paźniej apielacyjny sud źmianiŭ pakarańnie na pažyćciovaje źniavoleńnie.
Francyja (0,5 pramile)
Pakarańniem pjanamu kiroŭcu budzie štraf u 4,5 tysiačy jeŭra albo pazbaŭleńnie voli na termin da 6 miesiacaŭ. Francuzskaje prava praduhledžvaje roznyja limity ŭtrymańnia ałkaholu dla roznych kiroŭcaŭ, u zaležnaści ad taho, jakim transpartam (hramadskim, słužbovym abo asabistym) jany kirujuć.
Hiermanija (0,5 pramile i 0,0 pramile dla kiroŭcaŭ va ŭzroście da 21 hoda)
Kali norma ałkaholu pieravyšana nieistotna, kiroŭcu pahražaje štraf da 300 jeŭra. Kali jon vypje bolš, u lepšym vypadku ŭ jaho zabiaruć paśviedčańnie, u horšym - pahražaje pazbaŭleńnie voli da 5 hadoŭ. Darečy, viarnuć paśviedčańnie ŭ Hiermanii nie tak prosta. Dla hetaha treba zdavać śpiecyjalny test, jaki siarod niemcaŭ maje reputacyju składanaha i adkaznaha ekzamiena. Kožnaja sproba zdačy kaštuje 200 jeŭra.
Anhlija (0,8 pramile)
Pjanym kiroŭcam-anhielcam pahražaje štraf da 5 tysiač funtaŭ (kala 6 tysiač jeŭra) i pazbaŭleńnie paśviedčańnia minimum na 12 miesiacaŭ. U vypadku paŭtornaha zatrymańnia ŭ pjanym vyhladzie paśviedčańnie zabiaruć minimum na try hady. Kali ž pjany kiroŭca spravakuje śmiarotny vypadak, jamu pahražaje 10 hadoŭ pazbaŭleńnia voli.