Фота: NASA

Памідоры на фота — гэта толькі апошняя фаза працяглага эксперыменту па вырошчванні ядомых раслін ва ўмовах мікрагравітацыі і штучнага асвятлення касмічнай станцыі. Апошнія некалькі гадоў працы былі сканцэнтраваныя на ліставой зеляніне, у прыватнасці на шпінаце і травах, паведамляе TechCrunch.

Місія вывучыць «якасць святла і ўгнаенняў для вытворчасці садавіны, мікробную бяспеку харчовых прадуктаў, харчовую каштоўнасць, прымальнасць смаку для экіпажа і агульныя перавагі ўтрымання раслін і свежай ежы ў космасе для здароўя». Розныя камбінацыі ўмоў, наладжванне патокаў святла і пажыўных рэчываў дапамогуць убачыць, як вырабіць лепшыя памідоры ў космасе цягам 104-дзённага перыяду росту.

Фота: NASA

Як і наземнае садоўніцтва, гэта даволі складаны эксперымент для экіпажа МКС. Члены экіпажа даглядаюць расліны, забяспечваючы вадой, прарэджваючы расаду, апыляючы і сочачы за іх здароўем і прагрэсам — і, вядома, з'ядуць некаторую частку ўраджаю.

Таксама на МКС адпраўляюцца ёгурт, кефір і напой на аснове дрожджаў. Як вядома, некаторыя пажыўныя рэчывы нашмат больш карысныя, калі свежыя. І з гэтым могуць дапамагчы карысныя мікробы, падобныя да тых, якія знаходзяцца ў ёгуртах. BioNutrients-2 — гэта другая фаза спробы стварыць устойлівую для захоўвання сумесь, якая пры ўвільгатненні прыводзіць да выпрацоўкі бактэрыямі мэтавага пажыўнага рэчыва.

У біярэактарах бактэрыі і дрожджы вырабляюць пэўныя малекулы ў рамках сваіх нармальных біялагічных працэсаў, напрыклад, глюкозу. Але таксама яны могуць выкарыстоўвацца і для больш складаных малекул, такіх як некаторыя лекі. Але ці можна рабіць гэта эфектыўна і лёгка ў космасе і менавіта як гэта зрабіць — застаецца адкрытым пытаннем, на якое новыя эксперыменты праліюць крыху святла.

Пакеты ёгурта BioNutrients-2 пасля першапачатковага ўвільгатнення. Сіні колер змесціва мяшка зыходзіць ад індыкатара pH. Панэль, якая знаходзіцца за мяшкамі, дае арыенцір для пачатковага і канчатковага колераў / Фота: NASA/Dr. Anna-Lisa Paul

Касмічныя таматы — гэта не адзіны сад на МКС. Раней там ужо быў запушчаны эксперымент па вывучэнні эпігенетычнага ўздзеяння на расліны ва ўмовах мікрагравітацыі. Змены ў навакольным асяроддзі (асабліва такія, як жыццё на арбіце) могуць выклікаць змены ў тым, якія гены і якім чынам выяўляюцца.

Вядома, што гэтыя змены адбываюцца ў космасе, але пакуль невядома, ці з'яўляюцца змены спадчыннымі, і ці прывядуць пэўныя штамы ці мутацыі да атрымання больш зручных для космасу варыянтаў раслін. Даследаванне параўноўвае насенне і расліны, вырабленыя ў космасе, з насеннем, вырабленым на паверхні. Калі пашанцуе, людзі маглі б знайсці некаторыя спецыяльныя адаптацыі да мікрагравітацыі, якія дазваляюць раслінам квітнець у гэтых незвычайных умовах.

Клас
Панылы сорам
Ха-ха
Ого
Сумна
Абуральна

Хочаш падзяліцца важнай інфармацыяй ананімна і канфідэнцыйна?

Каб пакінуць каментар, калі ласка, актывуйце JavaScript у наладах свайго браўзеру