mapbelarus.by
Святлана Ціханоўская заклікае ўрад Літвы разгледзець санкцыі ў дачыненні да «Беларуськалія», калі гэта прадпрыемства і далей будзе пераследваць сваіх работнікаў за пратэсты, піша Delfi.lt.
У інтэрв'ю BNS Ціханоўская пацвердзіла, што прапанавала прадстаўнікам уладаў Літвы перагледзець умовы транзіту, калі «Беларуськалій» будзе працягваць рэпрэсіі супраць работнікаў з палітычных прычын. «Беларуськалій» карыстаецца літоўскімі чыгункамі і Клайпедскім марскім портам для экспарту ўласнай прадукцыі. Нарвежская кампанія Yara нядаўна папярэдзіла, што можа абмежаваць закупкі ўгнаенняў у «Беларуськалія» з прычыны рэпрэсій.
«Перадусім мы пачынаем з умоўных санкцый. Спачатку мы звязаліся з (нарвежскай) Yara. Яны паставілі ўмовы — калі звольніце работнікаў, мы перастанем закупляць вашу прадукцыю. Але звальненні працягнуліся, і санкцыі павінны стаць больш строгімі», — сказала яна.
«Мы просім не закупляць прадукцыю «Беларуськалія», каб грошы гэтых прадпрыемстваў не паступалі рэжыму Лукашэнкі. Гэта звязана не толькі з «Беларуськаліем», але таксама і з «Гродна Азотам», «Нафтанам» і іншымі кампаніямі, якія важныя для рэжыму.
Але мы не гаворым пра вечнае спыненне — з прыходам новага прэзідэнта або пераходнага перыяду ўсе сувязі павінны быць адноўленыя», — сказала Ціханоўская.
Адказ на пытанне аб тым, ці размаўляла яна пра гэта з прадстаўнікамі ўрада Літвы, быў станоўчым.
«Так, мы размаўлялі, але меркаванні палітыкаў падзяліліся.
Мы паднялі пытанне павышэння кошту транзіту, прывязкі да гэтага умоў — калі будзеце звальняць людзей, мы падымем кошты і спынім транзіт. Каб былі ўмовы — калі іх не выконваеце, мы ўвядзём дадатковыя абмежаванні», — мяркуе Ціханоўская.
