У пятніцу ў Манака прайшоў матч на Супэркубак УЭФА, які разыгралі пераможца Лігі чэмпіёнаў «Манчэстар Юнайтэд» і ўладальнік Кубку УЭФА «Зеніт» (Санкт-Пецярбург).
Піцерскі клюб выйграў зь лікам 2:1.
Пры канцы першага тайму лік адкрыў Павал Паграбняк, на 59-й хвіліне яго падвоіў партугальскі легіянер піцерцаў Дані.
Дані забіў свой першы гол за клюб. У пачатку гэтага тыдня партугалец перайшоў у «Зеніт» з маскоўскага «Дынама» за рэкордную для расейскага футболу суму – 30 млн эўра.
На 73-й Неманья Відзіч скараціў лік, але на большае МЮ не хапіла.
У самым канцы сустрэчы «чырвоныя д’яблы» лік зраўнялі. Але Пол Скоўлз забіў гол рукой, за што атрымаў другую жоўтую картку і быў прагнаны з поля.
Піцерскі «Зеніт» – супернік барысаўскага БАТЭ ў групавым турніры Лігі чэмпіёнаў.
Каманды згуляюць, нагадаем, у 3-м і 4-м турах. 21 кастрычніка – матч у Санкт-Пецярбургу, 5 лістапада – у Менску.