Šeść apazicyjnych struktur zaklikali hramadzian nie chadzić na vybary 26

Šeść biełaruskich apazicyjnych struktur vystupili z zaklikam da hramadzian nie chadzić na vybarčyja ŭčastki.

Bajkatavać parłamienckija vybary zaklikali

Abjadnanaja hramadzianskaja partyja (AHP), zarehistravanaja ŭ Čechii mižnarodnaja arhanizacyja «Małady front», arhkamitety pa stvareńni partyi «Biełaruskaja chryścijanskaja demakratyja» (BCHD) i «Biełaruski ruch», Biełaruski niezaležny prafsajuz rabotnikaŭ radyjoelektronnaj pramysłovaści i Rada biełaruskaj intelihiencyi.

Jak patłumačyŭ 21 vieraśnia na pres-kanfierencyi ŭ Minsku lidar AHP Anatol Labiedźka, zaklik adrasavany tym, chto jašče nie vyznačyŭsia z nahody hałasavańnia. «My zaklikajem ich 23 vieraśnia nie ŭdzielničać u farsie. U ich jość alternatyva — źjeździć da svaich baćkoŭ u viosku, schadzić u les u hryby, padychać pavietram, schadzić na rybałku. Heta ahulnaje naša pasłańnie, pasłańnie tych subjektaŭ, jakija tak ci inakš razam pracavali padčas vybarčaj kampanii «, — adznačyŭ palityk.

Sustaršynia arhkamiteta pa stvareńni BCHD Vital Rymašeŭski zajaviŭ: hałoŭnym kryteryjem pry acency vybaraŭ pa-raniejšamu zastajecca najaŭnaść u krainie palitźniavolenych i administracyjnyja aryšty aktyvistaŭ kampanii bajkotu.

«My ličym, što izalacyja asnoŭnych apanientaŭ režymu ad udziełu ŭ vybarčym pracesie — tolki heta dazvalaje pryznać vybary niezakonnymi», — padkreśliŭ Rymašeŭski.

Namieśnik staršyni «Maładoha frontu» Mikałaj Dziemidzienka nie zmoh prysutničać na pres-kanfierencyi, bo chavajecca ad supracoŭnikaŭ siłavych struktur, jakija vykazvajuć pavyšanuju ŭvahu da jaho piersony.

Dziemidzienka pieradaŭ svaju zajavu inšym udzielnikam sustrečy z žurnalistami. U joj skazana: «Pavodle ŭžo daŭniaj tradycyi pierad vybarami pačynajecca izalacyja maładziožnych aktyvistaŭ. Maładafrontaviec Źmicier Kramianiecki ŭžo za kratami, sprabujuć izalavać i inšych členaŭ „Maładoha frontu“. Čaho baicca Łukašenka? Adkazu niama, heta prosta chvaroba. Udzielničać u hetych vybarach mohuć tolki ludzi ź jaŭnymi prablemami abo ŭ stanie afiektu. Bajkot byŭ i zastajecca adzinym pravilnym rašeńniem».

Palityki na pres-kanfierencyi padkreślili: niaŭdzieł u vybarach źjaŭlajecca takim ža pravam hramadzianina, jak i ŭdzieł u ich.

BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH