U Biełarusi ŭ vieraśni startuje vytvorčaść sumiesnych z kitajskaj kampanijaj Geely lehkavych aŭtamabilaŭ. Pra heta paviedamiŭ siońnia ministr pramysłovaści Dźmitryj Kaciarynič.
Pavodle jaho słoŭ, ciapier zaviaršajucca budaŭničyja raboty na barysaŭskim zavodzie «Aŭtahidraŭzmacnialnik», atrymana abstalavańnie i idzie jaho mantaž, jaki budzie zavieršany ŭ vieraśni. Z hetaha momantu pačniecca vytvorčaść aŭtamabilaŭ z kamplektujučych. «Ja spadziajusia, što da kanca hoda my atrymajem pieršy aŭtamabil», — skazaŭ ministr. Ciapier pravodzicca siertyfikacyja, i da kanca hetaha miesiaca płanujecca atrymać «ŭchvaleńnie typu transpartnaha srodku, paśla čaho atrymajem mahčymaść realizoŭvać aŭtamabil u Biełarusi». Zatym aŭtamabil budzie addadzieny na vyprabavańnie dla atrymańnia adpaviednaha siertyfikatu ŭ Rasii.
Ministr nahadaŭ, što ŭ kastryčniku 2011 hoda byŭ padpisany miemarandum ab supracoŭnictvie pa vytvorčaści lehkavych aŭtamabilaŭ, a ŭ śniežni — stvorana sumiesnaje pradpryjemstva «Biełdžyli», jakoje było zarehistravana ŭ SEZ «Minsk».Baki padpisali pahadnieńnie ab pramysłovaj zborcy. U sakaviku 2012 hoda byŭ zaklučany inviestycyjny dahavor, pavodle jakoha abjom układańniaŭ u prajekt składzie 244,9 młn. dołaraŭ.
Prajekt budzie realizoŭvacca ŭ try etapy. Pieršy praduhledžvaje, što na zavodzie «Aŭtahidraŭzmacnialnik» buduć stvorany mahutnaści pa vytvorčaści 10 tys. aŭtamabilaŭ u hod. Na hetaj placoŭcy płanujecca da 2015 hoda vyrabić 28.900 aŭtamabilaŭ. Na druhim etapie płanujecca pavialičyć abjomy vytvorčaści da 60 tys. aŭtamabilaŭ u hod. Z hetaj metaj u 2013–2015 hadach u svabodnaj ekanamičnaj zonie ŭ vioscy Pierasady Barysaŭskaha rajona budzie pabudavany novy zavod ź inviestycyjami 66 młn. dołaraŭ. Na trecim etapie zapłanavany vychad mahutnaściaŭ novaha pradpryjemstva na 120 tys. aŭtamabilaŭ za hod.
