Ihar Kvaša naradziŭsia 4 lutaha 1933 hoda ŭ Maskvie. U 1941 siamja była vymušana źjechać u evakuacyju. A baćka, doktar chimičnych navuk Uładzimir Kvaša syšoŭ na front. Z vajny jon tak i nie viarnuŭsia. Paźniej artyst zhadvaŭ, što jany doŭha nie mahli daviedacca pra los baćki:
«Da hetaha času nie mahu skazać dakładna, što ź im adbyłosia, jak i kali mienavita jon zahinuŭ. My ŭsiu vajnu i šmat hadoŭ paśla spadziavalisia, što jon vierniecca. Ja pamiataju, jak paśla skančeńnia vajny čakaŭ baćku, jak mocna spadziavaŭsia na jaho viartańnie...Ale jon nie viarnuŭsia i, pa dakumientach, zahinuŭ u 1943 hodzie pad Stalinhradam. Ale ŭ nas jość listy baćki, datavanyja paźniej, čym heta padzieja... Uvohule, daviedacca praŭdu ciapier ciažka. Nijakaj mahiły ad baćki nie zastałosia. Na budynku chimika-technałahičnaha instytuta visić tablička, dzie ŭkazany imiony zahinuŭšych u Vialikuju Ajčynnuju vajnu. Siarod ich - imia majho baćki. Da hetaha miesca ja časam prychodžu».
Kvaša skončyŭ škołu-studyju MCHAT. Dva hady byŭ akcioram MCHAT. Z 1957 jon stanovicca akcioram maskoŭskaha teatra «Sovriemieńnik».
Šmat hadoŭ akcior źbiraŭ usiemahčymuju infarmacyju pra Iosifa Stalina.
«Jon mianie zaŭsiody cikaviŭ, jašče z rańniaj maładości. Ja da hetaha času nie mahu razabracca ŭ psichałohii hetaj pačvary, tamu što čałaviekam jaho nazvać nielha.Choć u tyja hady ja, jak i ŭsie, nie razumieŭ, što adbyvajecca ŭ krainie. Kali ŭ 1953 hodzie pravadyr pamior, ja, jak i ŭsie, płakaŭ». Svajoj najlepšaj rolaj jon nazyvaŭ jakraz Stalina ŭ filmie «Pad znakam Skarpijona».
Apošnija hady asnoŭnaj spravaj Kvašy była pieradača «Čakaj mianie», jakuju jon ličyŭ vielmi važnaj i patrebnaj.
U śniežni letaś jon vystupiŭ z krytykaj Pucina, Miadźviedzieva i «Adzinaj Rasii», zaklikaŭ prychodzić na mitynh apazicyi 24 śniežnia.
0
0
0
0
0
0
