Paśla skandału ŭ Centrvybarkamie i admovy ŭ rehistracyi kandydatam słuckamu pradprymalniku Alaksandru Sołapu pieradali infarmacyju ab apieracyi, jakaja rychtujecca suprać jaho z udziełam pravaachoŭnych orhanaŭ.
Nahadajem, 29 žniŭnia CVK nie zadavoliŭ skarhu niezarehistravanaha deputatam pa Słuckaj vybarčaj akruzie № 67 Alaksandra Sołapa. Jurydyčnych padstaŭ dla admovy ŭ rehistracyi nie było.
Centrvybarkam pryniaŭ hetaje rašeńnie «pamaralna-etyčnych mierkavańniach».Sakratar CVK Mikałaj Łazavik zajaviŭ, što jon kožny dzień atrymlivaje listy z prośbami «nie rehistravać Sołapa, tamu što jon złačyniec».
Prapanovu Łazavika pakinuć rašeńnie akruhovaj kamisii ŭ sile padtrymali dzieviać čałaviek. «Suprać» prahałasavała 1 Lidzija Jarmošyna.
Rašeńnie CVK Alaksandr Sołap maje namier asprečyć u Viarchoŭnym Sudzie.
Praź niekalki hadzin paśla pasiedžańnia CVK da Alaksandra Sołapa i jaho žonki ŭ skviery kala budynka KDB u Minsku padyšoŭ nieviadomy. Mužčyna nazvaŭsia dobrazyčliŭcam i skazaŭ, što vałodaje infarmacyjaj ab apieracyi, jakaja rychtujecca suprać Alaksandra z udziełam pravaachoŭnych orhanaŭ.
Pa słovach nieznajomca, Alaksandra Sołapa źbirajucca zatrymać u aŭtamabili i pry pieratrusie znojduć narkotyki ci zbroju.
«Nie viedaju, što mnie rabić, — ździŭlajecca Alaksandr Sołap. — Mianie ŭ padpolle zmušajuć sychodzić?».
