Delehaty źjezda Partyi BNF, što prachodzić 4 žniŭnia ŭ Minsku, pryniali zajavu z patrabavańniem nieadkładna i biezumoŭna vyzvalić pravaabaroncu Alesia Bialackaha i ŭsich inšych palityčnych źniavolenych.
«My patrabujem ad uładaŭ Biełarusi spynić nacisk i pieraśled hramadskich i palityčnych aktyvistaŭ i pravaabaroncaŭ, a taksama pryvieści zakanadaŭstva krainy ŭ adpaviednaść ź mižnarodnymi standartami ŭ śfiery abarony pravoŭ čałavieka», — havorycca ŭ zajavie.
Asudžeńnie Alesia Bialackaha Partyja BNF nazyvaje «niezakonnym, źviazanym ź jaho pravaabarončaj dziejnaściu». «Aryšt Bialackaha staŭ vynikam šmathadovaj metanakiravanaj palityki biełaruskich uładaŭ adnosna pravaabarončych i hramadskich arhanizacyj, palityčnych partyj», — upeŭnieny delehaty źjezda.
U zajavie padkreślivajecca: vyzvaleńnie palitźniavolenych «źjaŭlajecca nieabchodnaj umovaj dla pačatku nacyjanalnaha dyjałohu, ustanaŭleńnia ŭ krainie hramadskaha miru, praviadzieńnia svabodnych i spraviadlivych vybaraŭ». Najaŭnaść ža palitźniavolenych «nanosić uron mižnarodnamu statusu krainy, viadzie da jaje izalacyi».
Partyja BNF taksama vykazvaje «padtrymku i ŭdziačnaść usim biełaruskim pravaabaroncam, jakija ŭ nadzvyčaj ciažkich umovach praciahvajuć sumlenna i prafiesijna abaraniać pravy čałavieka, adstojvać pryncypy svabody i demakratyi».
Aleś Bialacki byŭ aryštavany roŭna hod tamu i asudžany na čatyry z pałovaj hady pazbaŭleńnia voli ŭ kałonii ŭzmocnienaha režymu z kanfiskacyjaj majomaści. Ź inicyjatyvy rasijskich pravaabaroncaŭ dzień aryštu Bialackaha, 4 žniŭnia, abvieščany Mižnarodnym dniom salidarnaści z hramadzianskaj supolnaściu i pravaabarončym rucham Biełarusi.