Strukturnyja źmianieńni ŭ «Biełtech Chołdynhu» i «Biełtecheksparcie»

U suviazi sa źmienaj mažarytarnaha akcyjaniera ZAT «Kirujučaja kampanija chołdynhu «Biełtech Chołdynh», jaki vałodaje kantrolnym pakietam akcyj u ZAT «Biełtechekspart», adbylisia strukturnyja źmianieńni va ŭpraŭleńni ZAT «Kirujučaja kampanija chołdynhu «Biełtech Chołdynh» i ZAT «Biełtechekspart». Pra heta paviedamlajecca na sajcie «Biełtechekspartu».

Pa inicyjatyvie novaha akcyjaniera ŭ ZAT «Kirujučaja kampanija chołdynhu «Biełtech Chołdynh» raspuščany Saviet dyrektaraŭ i adbyłasia źmiena dyrektara i hałoŭnaha buchhałtara.

Pa inicyjatyvie novaha akcyjaniera ŭ ZAT «Biełtechekspart» sfarmiravany novy skład Savieta dyrektaraŭ, jaki ŭznačaliŭ asabista Dźmitryj Hurynovič, zamienieny hałoŭny buchhałtar i načalnik jurydyčnaha ŭpraŭleńnia.

Nahadajem, u pačatku červienia kampanija ZAT «Biełtechekspart» paćvierdziła infarmacyju ab źmienie ŭładalnika kantrolnaha pakieta akcyj hrupy kampanij ZAT «Kirujučaja kampanija «Biełtech Chołdynh», u jakuju ŭvachodzić ZAT «Biełtechekspart». «Uładalnikam kantrolnaha pakieta akcyj hrupy kampanij staŭ rasijski biźniesmien, vypusknik Rasijskaj akademii narodnaj haspadarki i dziaržaŭnaj słužby pry prezidencie RF Hurynovič Dźmitryj Fiodaravič. Piefcijeŭ Uładzimir Paŭłavič naohuł spyniŭ svoj udzieł u dziejnaści ŭkazanaj hrupy kampanij», — havaryłasia ŭ aficyjnym paviedamleńni.

U im adznačałasia, što «heta ździełka ažyćcioŭlena ŭ miežach intehracyi Rasii i Biełarusi ŭ halinie VTS (VTS — vajenna-techničnaje supracoŭnictva. — BiełaPAN.) i śviedčyć pra ŭzmacnieńnie adkrytaści dźviuch krain, a taksama ŭsialaje ŭpeŭnienaść u tym, što ZAT „Biełtechekspart“ vyjdzie na pryncypova novyja pazicyi na suśvietnym rynku».

Infarmacyja pra ździełku źjaviłasia ŭ ŚMI 30 maja, adnak tady kamientavać jaje ŭ «Biełtecheksparcie» admovilisia. 31 maja prodaž paćvierdziŭ pieršy namieśnik staršyni Dziaržaŭnaha vajenna-pramysłovaha kamiteta Biełarusi Raman Hałoŭčanka. Pry hetym jon adznačyŭ, što «Biełtechekspart» nie ŭvachodzić u strukturu Dziaržkamvajenprama, a tamu kamitet, choć i kaardynuje jaho dziejnaść u častcy ažyćciaŭleńnia źniešniaj handlovaj dziejnaści, na kiraŭnickija pytańni nie ŭpłyvaje.

20 červienia 2011 hoda Saviet ES pryniaŭ rašeńnie pašyryć śpis biełaruskich hramadzian i kampanij, na jakija raspaŭsiudžvajucca sankcyi ŭ suviazi z parušeńniem pravoŭ čałavieka ŭ Biełarusi, uklučyŭšy ŭ jaho ŭ tym liku Uładzimira Piefcijeva i try kampanii — ZAT «Biełtechekspart», ZAT «Sport-pary» i PUP «BT Telekamunikacyi». U dakumientach ES Piefcijeŭ značycca jak «asoba, źviazanaja z prezidentam Łukašenkam i jaho siamjoj, hałoŭny ekanamičny savietnik prezidenta Łukašenki i klučavy finansavy sponsar režymu Łukašenki, staršynia savieta akcyjanieraŭ „Biełtecheksparta“, bujniejšaj u Biełarusi kampanii impartu-ekspartu ŭzbrajeńniaŭ».

Sankcyi ŭ dačynieńni da nazvanych kampanij byli ŭviedzienyja na padstavie taho, što ŭsie jany «padkantrolnyja Uładzimiru Piefcijevu». Piefcijevu zabaroniena naviedvać terytoryju ES, a jaho rachunki i majomaść u krainach ES pavinny być zamarožany. Jaho kampanijam zabaroniena vieści biźnies na terytoryi krain ES. Heta rašeńnie Piefcijeŭ asprečvaje ŭ sudzie Jeŭrasajuza, kudy 12 žniŭnia nakiravaŭ isk.

Pavodle mierkavańnia ekśpiertaŭ, ździełka maje na mecie vyviadzieńnie kampanii z-pad dziejańnia sankcyj Jeŭrapiejskaha sajuza, adnak dla hetaha nieabchodna nie tolki źmiena ŭłaśnika, ale i vialikija źmianieńni ŭnutry struktury. Nie vyklučajecca i źmiena nazvy.

0

0

0

0

0

0

BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH