«Kommiersant»: Asudžanaha za špijanaž eks-pałkoŭnika FSB Michajłava mohuć abmianiać na Buta 5
Michajłaŭ z 2001 pa 2007 hod pieradaŭ ahientam CRU tysiačy sakretnych dakumientaŭ.
Pra heta piša «Kommiersant».
Eks-supracoŭnik rasijskaj śpiecsłužby abvinavačvaŭsia ŭ tym, što z 2001 pa 2007 hod pieradavaŭ ahientam CRU tysiačy sakretnych dakumientaŭ, jakija FSB rychtavała dla kiraŭnictva krainy.
Pavodle źviestak «Kommiersanta», Michajłaŭ, jakoha ŭ CRU ličać adnym sa svaich samych paśpiachovych ahientaŭ za apošnija hady, spadziajecca, što ŭłady ZŠA abmianiajuć jaho na kaho-niebudź z rasijskich špijonaŭ. Takija precedenty ŭžo byli. Samym viadomym ź ich staŭ abmien u 2010 hodzie ŭdzielnikaŭ sietki rasijskich ahientaŭ, adnoj ź jakich była En Čepmen, na asudžanych za špijanaž u Rasii.
Dziakujučy abmienu svabodu atrymali byłyja supracoŭniki SVR i HRU Alaksandr Zaparožski i Siarhiej Skrypal, jakija adbyvali 18- i 13-hadovy terminy za zdaču niekalkich sotniaŭ rasijskich ahientaŭ za miažoj.
Pryčym hetym razam u abmiennaj apieracyi mohuć być vykarystanyja i asoby, nie źviazanyja sa špijanažam, naprykład, asudžanyja na 25-hadovy termin za handal zbrojaj Viktar But i piłot Kanstancin Jarašenka, jakomu pryznačyli 20 hadoŭ pazbaŭleńnia voli za zmovu z metaj kantrabandy 5 t kakainu.
Ciapier hienprakurory ZŠA i Rasii abmiarkoŭvajuć mahčymaść ich adpraŭki ŭ Rasiju dla adbyvańnia pakarańnia, ale kali baki nie damoviacca, pavodle dadzienych krynic «Kommiersanta», «mohuć być prapanavanyja inšyja varyjanty».
