Vyzvaleńnie byłoha kandydata ŭ prezidenty Andreja Sańnikava i člena jaho kamandy Dźmitryja Bandarenki «pakazvaje siłu ES». Pra heta viarchoŭny pradstaŭnik ES pa źniešniaj palitycy i palitycy biaśpieki Ketryn Eštan zajaviła jeŭraparłamientaryjam u Luksiemburhu 17 krasavika.
«Ja zadavolenaja, što ŭ Biełarusi spadary Sańnikaŭ i Bandarenka vyzvalenyja z turmy. My padtrymlivajem suviaź, i ja sapraŭdy spadziajusia, što, mahčyma, u Biełarusi ŭ nas jość šanc», — skazała Eštan na pasiadžeńni, što tranślavałasia ŭ žyvym efiry sajtam Jeŭraparłamienta.
Pavodle słoŭ dypłamata, heta vyzvaleńnie pakazvaje, čamu dla ES tak važna zachoŭvać adzinstva.
Sańnikaŭ i Bandarenka byli aryštavany paśla nasilnaha razhonu apazicyjnaj akcyi pratestu ŭ Minsku ŭ dzień prezidenckich vybaraŭ 19 śniežnia 2010 hoda. Dabivajučysia vyzvaleńnia i reabilitacyi ich i inšych apanientaŭ ułady, ES uvioŭ sankcyi ŭ dačynieńni da socień pradstaŭnikoŭ biełaruskaj dziaržavy i dziasiatkaŭ biełaruskich kampanij.
5 krasavika na naradzie pa źniešniaj palitycy Łukašenka zajaviŭ, što ŭ chutkim časie razhledzić pytańnie ab pamiłavańni niekatorych asudžanych apazicyjnych palitykaŭ. Sańnikaŭ i Bandarenka byli vyzvalenyja na minułym tydni.
Pavodle źviestak biełaruskich pravaabaroncaŭ, u miescach pazbaŭleńnia voli zastajucca jašče 13 palitźniavolenych.
