Stvoranyja rabočyja hrupy pa analizu składu čerhaŭ na žyllovaje budaŭnictva 3

Pra heta paviedamiŭ na pres-kanfierencyi 14 lutaha namieśnik prem'jer-ministra Anatol Kalinin.

Pavodle jaho słoŭ, jany stvorany na asnovie rasparadžeńnia prem'jer-ministra. Hetyja hrupy sumiesna ź miascovymi ŭładami analizujuć padstavy ŭklučeńnia ŭ budaŭničyja kaapieratyvy i praviadzieńnie źvierki čarhavikoŭ. «Daručana vyjavić, jakija katehoryi hramadzian uščemlenyja pa pryniatym ukazie № 13 i pryniać adpaviednyja rašeńni», — paviedamiŭ Kalinin. Hetaje pytańnie budzie zasłuchana na pasiadžeńni ŭrada i ŭ prezidenta ŭ sakaviku.

Vice-premjer adznačyŭ, što ŭ metach realizacyi ŭkaza prezidenta № 13, jaki vyznačyŭ katehoryju hramadzian, što mohuć budavać žyllo ź dziaržpadtrymkaj, padpisany pratakoł prem'jer-ministra i staršyni Nacbanka. Bankam daručana zabiaśpiečyć vydzialeńnie lhotnych kredytaŭ hramadzianam, jakija zaklučyli kredytnyja dahavory na raniej pryniatych umovach.

Abłvykankamam i Minharvykankamu daručana da 17 lutaha pierahledzieć śpisy ŽBPK i hramadzianam, jakija stajać u čarzie.

«Z ulikam taho, što pryniaty ŭkaz, ilhotnaje kredytavańnie hramadzian, jakija zaklučyli dahavory i adnosiacca da lhotnaj katehoryi zhodna z ukazam, budzie praciahnuta na raniej dziejnych umovach z pavieličeńniem pamieru adkrytych kredytnych linij koštu budaŭnictva žylla. Kali pavialičvajecca košt žylla, u hetaj katehoryi źjavicca mahčymaść dakredytavacca», — patłumačyŭ Kalinin.

«Druhaja katehoryja — heta hramadzianie, jakija zaklučyli kredyty da ŭvachodžańnia ŭ siłu ŭkaza i nie adnosiacca da lhotnaj katehoryi. Jany buduć kredytavacca na raniej dziejnych umovach bieź pieraliku pamieru adkrytych kredytnych linij z ulikam źmianieńnia koštu budaŭnictva», — paviedamiŭ vice-premjer. «Choć my razhladajem va ŭradzie mahčymaść praciahu kredytavańnia i z ulikam pavieličeńnia koštu budaŭnictva», — adznačyŭ Kalinin.

Treciaja katehoryja hramadzian, jakija da ŭvachodžańnia ŭ siłu ŭkaza nie zaklučyli kredytnyja dahavory, buduć kredytavacca na novych umovach, kali jany adniesieny da lhotnikaŭ, vyznačanych ukazam.

Jak paviedamlałasia, u čarzie na hety čas znachodziacca 855 tys. majučych patrebu, ź jakich 368 (43%) uklučanyja ŭ śpisy lhotnikaŭ na atrymańnie dziaržpadtrymki, u tym liku majučych prava lhotnaha kredytavańnia — 100 tys.

0

0

0

0

0

0

BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH