Pradstaŭniki ryełtarskich kantoraŭ nieaficyjna paćviardžajuć, što były kyrhyzski lidar Kurmanbiek Bakijeŭ kupiŭ za 2 miljony dalaraŭ elitny katedž u Raŭbičach pad Minskam, adnak padrabiaznaści ździełki padavać bajacca — niepakojacca, što heta nehatyŭna adabjecca na biznesie.
Jak kažuć supracoŭniki ahienctvaŭ nieruchomaści, nie tak daŭno były kyrhyzski lidar zajmieŭ u Biełarusi ŭłasny kut. Adpačatku Bakijeŭ z maładoj žonkaj i dvuma małymi dziećmi žyŭ u adnym z sanatoryjaŭ u Biarezinskim bijasfernym zapaviedniku, adnak ci to biełaruski bok pierastaŭ zadavalniać śpiecyfičny kvatarant, ci to Bakijeŭ sabraŭsia puścić u Biełarusi karani nadoŭha, ale situacyja źmianiłasia.
Na ŭmovach ananimnaści adzin z ryełtaraŭ raspavioŭ, što Bakijeŭ aformiŭ dosyć admietnuju pa biełaruskich mierkach ździełku:
«U Raŭbičach katedž — cahlany, trochpaviarchovy, z centralnymi kamunikacyjami. Košt — 2 miljony 50 tysiač dalaraŭ.Zrazumieła, što taki košt maje na ŭvazie najaŭnaść usich vyhodaŭ, jakija tolki možna sabie ŭjavić».
Praŭda, pry hetym ryełtar udakładniaje, što košt urešcie moh być «źbity» da 1 miljona 700 tysiač dalaraŭ, bo takaja papiaredniaja damoŭlenaść z haspadarom była. Taksama pakul niama źviestak, kali kankretna navasioły miarkujuć pierasialicca ŭ novaje žyllo. Darečy, trapić na terytoryju, dzie ŭ Raŭbičach mieściacca elitnyja katedžy, dosyć składana: ujezd u achoŭnuju zonu — praz šłahbaŭm, jaki adkryvajecca admysłovym čypam.