U Biełarusi ŭ ŁPP adpraŭlajuć z arkiestram. Fota Julii Daraškievič.
U «NN» źviarnuŭsia čytač M. z Žodzina. Jon napisaŭ pra ŭmovy ŭtrymańnia ŭ adnym ź biełaruskich lačebna-pracoŭnych prafiłaktoryjaŭ, kudy źmiaścili jaho žonku. Havorka pra žanočy ŁPP №2 u vioscy Starasielle Horackaha rajona Mahiloŭskaj vobłaści. Čytač śćviardžaje, što nasielnicy prafiłaktoryja sa svajho zarobku ničoha nie atrymlivajuć — usie hrošy nibyta iduć na apłatu charčavańnia i pražyvańnia. «Prosta izalavali na hod», — piša mužčyna.
M. narakaje, što jamu na spatkańnie z žonkaj adviali tolki try hadziny. Heta pry tym, što daroha da ŁPP u jaho zaniała amal u piać razoŭ bolš.
U svaim liście čytač zadaje šerah pytańniaŭ nakont pracy padobnych ustanovaŭ u cełym. Čamu ŁPP znachodziacca ŭ padparadkavańni Ministerstva ŭnutranych spraŭ, a nie Ministerstva achovy zdaroŭja? Čamu ŭ nakiravanych u prafiłaktoryj niama mahčymaści daterminovaha vyzvaleńnia? «Tamu, što rabočamu treba płacić. A hrošaj u dziaržavy niama. Zatoje jość ałkaholiki, niachaj jany pracujuć na dziaržavu za tak. Voś i zabirajuć ich u rabstva», — vykazvaje ŭłasnuju zdahadku M.
Aficyjna
Namieśnik načalnika ŁPP №2 pa vypraŭlenčym pracesie i pracy z asabistym składam Juryj Tarasievič paraiŭ našamu čytaču aznajomicca z Zakonam «Ab paradku i ŭmovach nakiravańnia hramadzian u lačebna-pracoŭnyja prafiłaktoryi i ŭmovach znachodžańnia ŭ ich» ad 4 studzienia 2010 № 104-Z.patłumačyŭ Ju. Tarasievič. Jon dadaŭ, što da jaho asabista padobny list sa skarhaj na ŭmovy ŭtrymańnia ŭ ŁPP №2 nie prychodziŭ.«My dziejničajem u adpaviednaści z hetym zakonam», —
Zhodna z zakonam
U ŁPP traplajuć tyja, chto ciaham hodu try i bolš razy ździajśniaŭ pravaparušeńni ŭ stanie apjanieńnia.Paśla hetaha milicyja moža pryciahnuć čałavieka da miedycynskaha aśviedčańnia. Aśviedčanamu vypisvajuć papiaredžańnie pra toje, što jašče adzin učynak u stanie apjanieńnia paciahnie źmiaščeńnie ŭ ŁPP. Zakon daje mahčymaść asprečvać dziejańni milicyi na ŭsich etapach.
Nasielniki ŁPP majuć prava na sacyjalny adpačynak z pravam vyjezdu za miežy ŁPP: na spatkańnie z žonkaj (mužam), blizkimi svajakami dy inšymi hramadzianami. Dla hetaha nieabchodna napisać zajavu.
Spatkańni mohuć być karotkaterminovymi — da troch hadzin, a taksama bolš praciahłymi — da troch sutak.
Hramadzianie, źmieščanyja ŭ prafiłaktoryj, abaviazanyja kampiensavać sa svajho zarobku zatraty na charčavańnie, adzieńnie i abutak, kamunalna-bytavyja pasłuhi.Adnak niezaležna ad usich vyličeńniaŭ na asabisty rachunak hramadzian pieraličvajecca nie mienš za 25% naličanaha zarobku i pryroŭnienych da jaho prybytkaŭ.
Adzinyja ŭ śviecie
Lačebna-pracoŭnyja prafiłaktoryi ŭ Biełarusi stvarajucca i likvidujucca zhodna z rašeńniem kiraŭnika krainy. Jany znachodziacca ŭ padparadkavańni Ministerstva ŭnutranych spraŭ.
Kantrol za vykanańniem zakanadaŭstva ździajśniaje Hienprakuratura, za dziejnaściu prafiłaktoryjaŭ — Departamient vykanańnia pakarańniaŭ MUS, za akazańniem miedycynskaj dapamohi — ździajśniaje Minachovy zdaroŭja.
U krainie dziejničaje 6 ŁPP — pa adnym na kožnuju vobłaść (akramia Bresckaj) i dva ŭ Minskaj. U siarednim za hod praz prafiłaktoryi prachodzić kala 4000 hramadzian.
Starasielski prafiłaktoryj — adzinaja ŭ śviecie padobnaja ŭstanova dla žančyn.
Na postsavieckaj prastory, akramia Biełarusi, ŁPP dziejničajuć u Turkmienistanie. Rasija i Ukraina, jakija kolki hod tamu likvidavali svaje ŁPP, u apošni čas na ŭzroŭni ŭładaŭ zadumvajucca pra viartańnie padobnaj praktyki.
Kudy źviartacca:
Departamient vykanańnia pakarańniaŭ MUS
220006, h. Minsk, vuł. Aranskaja, 1.
Pryjomnaja načalnika: teł. (8-017) 218-79-38.
Hienprakuratura
220030, h.Minsk, vuł. Internacyjanalnaja, 22.
Telefon dla zvarotaŭ hramadzian: (017) 328-55-41.
Hladzi jašče: U ŁPP z arkiestram.