Dziasiatki biełarusaŭ znachodziacca na kurortach pa turach zbankrutavałaj firmy «Łanta-tur Vajaž» 3

Akramia taho, u niemałoj kolkaści biełaruskich turystaŭ apłačanyja tury hetaha apieratara taksama z vyletam z Maskvy ŭ najbližejšy čas.

Pieršaja infarmacyja pra zboi ŭ pracy maskoŭskaha turapieratara pastupiła 27 studzienia. A ŭ subotu, 28 studzienia, apieratar na svaim sajcie aficyjna abviaściŭ pra bankructva. Nakolki ščylna biełaruskija apieratary supracoŭničali z «Łanta-tur Vajaž» i jak ajčynny turbiźnies źbirajeca vyrašać niepaźbiežnyja prablemy z turystami? Situacyju prakamientavali pradstaŭniki biełaruskich turystyčnych firmaŭ, jakija źjaŭlajucca ahientami viadomaha maskoŭskaha apieratara.

Kaža Natalla Šarepa, namieśnik dyrektara firmy «Tuson Vajaž»:

«Siońnia da našych turystaŭ, što adpačyvajuć u Tajłandzie, pryjšli pradstaŭniki prymajučaha boku i skazali, što ŭ turystaŭ nie apłočany zvarotny tranśfier (dniami jany mielisia vylatać nazad). Choć „Tuson Vajaž“ pieraličyŭ „Łanta-tur Vajaž“ całkam uvieś košt turpakieta.

Ciapier biełaruskim turystam nie zastajecca ničoha, jak zapłacić za tranśfier ułasnymi hrašyma. Kali našy klijenty prylaciać u Minsk, budziem kampiensavać im vydatki, a zatym sprabavać razabracca z „Łanta“.

Telefony firmy maŭčać, i znajści niekaha z supracoŭnikaŭ niemahčyma. U aŭtorak niekalki našych klijentaŭ taksama pavinny palacieć u Tajłand pa turpakiecie kampanii „Łanta-tur Vajaž“, zaraz šukajem mahčymaść pierasadzić ludziej na inšyja rejsy, ź inšym apierataram. Zrazumieła, usio heta budzie adbyvacca za naš košt.

Naohuł, adzin u adzin paŭtarajecca situacyja, jakuju my ŭžo nazirali, kali zbankrutavaŭ bujny rasijski apieratar „Kapitał-Tur“.

Biełaruskija kampanii paciarpieli tady ŭ dastatkova vialikaj stupieni. Heta śviedčyć pra toje, što my pavinny być vielmi abačlivymi, pracujučy z rasijskimi kampanijami».

Inšyja biełaruskija kampanii, jakija pradajuć ekzotyku, taksama śćviardžajuć, što z «Łanta-tur Vajaž» na kurortach «padvisła» dosyć vialikaja (dla našaha rynka) kolkaść biełaruskich turystaŭ — nie sotni, viadoma, ale dziasiatki.

Jak apieratar «Łanta-tur» nie źjaŭlajecca hulcom pieršaha ešałona dla biełaruskaha rynku («pieršy ešałon» — heta «Tez Tur», «Natali Turs», «Piehas turystyk», «Korał Trevieł»). Ale ŭsio ž taki zimoj zbankrutavały apieratar dosyć aktyŭna realizoŭvaŭ u Biełarusi turpakiety na takija napramki, jak Hoa, Tajłand, Daminikanskaja Respublika, Vjetnam, Kitaj i inšyja.

«My doŭhi čas źjaŭlalisia hienieralnymi pradstaŭnikami „Łanta-tur Vajaž“ u Biełarusi, — kamientuje Uładzimir Makoŭski, kiraŭnik viadomaj biełaruskaj firmy „Vniešinturist“, — ale pa asabliva kamiercyjnych pryčynach pryblizna paŭhoda tamu razarvali damovu. Jak mnie zdajecca, mahčymaja pryčyna bankructva apieratara ŭ tym,

što zanadta šmat kirunkaŭ było ŭ kampanii.

U takich vypadkach u apieratara zaduža abaviazacielstvaŭ i zanadta šmat numaroŭ na harantyjach u hatelach. Heta ciahnie niepaźbiežnyja vielizarnyja vydatki, jakim kampanija ŭ niejki momant moža nie dać rady».

Pra toje ž samaje — pra nadzvyčajnuju šmatprofilnaść kampanii pry vielmi siaredniaj kapitalizacyi — kaža i kiraŭnik sietki mahazinaŭ haračych puciovak «Mys» Vadzim Atroščanka. Biełarusy — klijenty «Mysa», što palacieli pa pucioŭkach «Łanta-tur Vajaž», taksama ciapier znachodziacca na niekalkich ekzatyčnych kurortach, i ich adpačynak praciahvajecca.

Na pytańnie, ci jość vierahodnaść, što biełarusaŭ mohuć prosta vysielić z hatelaŭ, Vadzim Atroščanka adkazaŭ tak:

«My na suviazi z klijentami, i pakul takich tryvožnych paviedamleńniaŭ nie pastupała. Na moj pohlad, vierahodnaść takoha pavarotu padziej małaja — navat kali „Łanta-tur Vajaž“ nie pieraličyła całkam apłatu hatela. Reč u tym, što tajskija chateljery vielmi dbajuć pra svaju reputacyju,

i jašče nie było vypadku, kab jany vykidali ludziej na vulicu.

Akramia taho, u Tajłandzie vielmi mocnaje rasijskaje konsulstva, jakoje taksama nie dazvolić davieści fors-mažor da brutalnaha skandału. Što tyčycca bližejšych vyletaŭ našych turystaŭ, to my, jak zaŭsiody, biarem ŭsie vydatki na siabie, pakolki nam daražej našy klijenty i naša reputacyja».

Dadamo, što zaraz u «padviešanym» stanie apynulisia kala 8 tysiač klijentaŭ kampanii «Łanta-tur Vajaž».

Cikava, što kiraŭnik zbankrutavałaj apieratarskaj kampanii — Ludmiła Pučkova — naša suajčyńnica, jana rodam z Barysava, dzie ŭ jaje ciapier žyvuć svajaki.

Lilija Kobzik, tio.by

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH