Jak nabyć ajfon za sto dalaraŭ 41

Biełarusy, jakija chočuć paŭdzielničać u aŭkcyjonach, kab atrymać adrenalin ad pracesu tarhoŭ i ŭ jakaści ŭznaharody zajmieć patrebny tavar, vymušanyja karystacca zamiežnymi sajtami. Čamu? Reč u tym, što ajčynnyja internet-aŭkcyjony tak i nie zdabyli papularnaści. Bolšaść biełarusaŭ nie nadta lubić handlavacca, imknučysia kuplać tavary pa fiksavanych cenach. Navat u hazietach z abjavami frazy «torh darečny» sustrakajucca redka.

A voś zachodni śviet tarhujecca z zadavalnieńniem. Adzin z najbujniejšych i najpapularniejšych sajtaŭ — amierykanski internet-aŭkcyjoneBay — maje niekalki miljonaŭ zarehistravanych uhodaŭ što-dzień. Za piatnaccać hadoŭ pracy kampanija vyjšła na hadavy zvarot u $10 miljardaŭ i stała sapraŭdy suśvietnaj karparacyjaj. Bolšaść biełarusaŭ, jakija nabyvajuć były ŭ karystańni tavar, zachodziać mienavita na hety sajt.

U apošnija hady niekatoryja pakupniki stali hladzieć i ŭ bok Kitaja. Tamtejšyja partały prapanujuć vialiki vybar miascovaha niedarahoha tavaru, samyja vialikija ŭžo zajmieli rasijskamoŭnyja viersii (naprykład, rutaobao.com).

Chto bolš? Pradadziena!

Pryncyp tarhoŭ adnolkavy paŭsiul — ad Zachadu da Uschodu. Pradaviec vystaŭlaje łot i ŭmovy zaklučeńnia ŭhody. Naprykład, vystaŭlajecca łot — były ŭ karystańni telefon iPhone 3. Startavaja cana składaje $100. U Biełarusi, darečy, taki samy kaštuje kala $200. Čaściakom pradaviec ukazvaje, što kali niejki achvotnik zachoča kupić tavar adrazu za $150, to tarhi spyniajucca imhnienna. Kali takoj umovy niama, paviedamlajecca, kolki budzie praciahvacca aŭkcyjon — dzień, tydzień ci navat miesiac.

Na sajtach pradajecca nie tolki technika, zaŭsiody jość vialiki vybar adzieńnia, knih, muzyki i pryjemnych drobiaziaŭ. Kali dobra pašukać, možna znajści zusim rarytetnyja rečy.

Varta razhladać tolki tyja tavary, pradaviec jakich hatovy vysłać ich u Biełaruś. Mnohija staviacca da pakupnikoŭ z postsavieckaj prastory ź niedavieram, bo čakajuć ad ich machlarstva. Źviartajcie ŭvahu i na reputacyju pradaŭca. Kali jon maje šmat niehatyŭnych vodhukaŭ, moža, niavarta ryzykavać?

Kali narešcie kankurenty zdalisia i zastałasia tolki vašaja prapanova nabyć iPhone 3, čas apłačvać tavar.

Elektronnamu aŭkcyjonu — elektronnuju apłatu

Dla apłaty patrebna mieć bankaŭskuju kartku, a taksama zarehistravacca ŭ płaciožnaj sistemie PayPal.

Pakolki Ebay — amierykanskaja kampanija, tamu dla pracy ź joj vyhadniej adkryvać kartku Visa (rachunak u dalarach), čym Mastercard (u jeŭra). Možna pasprabavać źviarnucca ŭ roznyja biełaruskija banki, adnak pastajannyja pakupniki rajać zrabić vybar pamiž troch varyjantaŭ: «Bank Maskva-Minsk», «BPB-Aščadbank» ci «Alfabank». Zarehistravacca ŭ płaciožnaj sistemie PayPal praściej prostaha, dastatkova zajści na jaje sajt. Važnaje ŭdakładnieńnie: krainaj pražyvańnia daviadziecca ŭkazvać Rasiju, bo Biełarusi ŭ prapanavanym śpisie niama. Adnak paśla nie zabudźciesia dapisać sapraŭdnuju nazvu krainy ŭ adrasie.

Atrymaŭšy paćvierdžańnie apłaty, pradaviec vyšle tavar. U zaležnaści ad abjomu kupli dastaŭka z ZŠA moža kaštavać ad $2 da $130. U pieršym vypadku heta maleńki kanviert, u druhim — dziesiacikiłahramovaja skrynka siarednich pamieraŭ.

Mytnyja pieraškody

Šlach tavaru da Biełarusi zvyčajna zajmaje adzin-dva tydni. Ale treba być hatovym zapłacić mytu, kab atrymać tavar. Heta adbu-dziecca, kali jon kaštavaŭ bolš za 120 jeŭra. Myta składaje 30% ad «pieraboru», što robić mnohija kupli niavyhadnymi. Naprykład, za noŭtbuk za 620 jeŭra daviadziecca dapłacić ažno 150 jeŭra. Pryčym limit datyčycca nie adnoj pasyłki, a ŭsich atrymanych tavaraŭ na praciahu miesiaca. Kali ž košt tavaru zachodzić za 1000 jeŭra, to ŭmovy stanoviacca prosta drakonaŭskimi. Dziaržava zapatrabuje spłacić 60% ad koštu. Hrošy možna addać albo na mytni, albo na pošcie.

U susiedziaŭ umovy bolš libieralnyja. Naprykład, rasijcy mohuć atrymlivać tavaraŭ na 1000 jeŭra, nie płaciačy myta, ukraincy — na 200 jeŭra. Tamu, kali jość mahčymaść, vyhadniej zamaŭlać pasyłki na adras rasijskich svajakoŭ.

Možna paprasić pradaŭca, kab jon ukazaŭ u dakumientach troški mienšy košt, ale na taki padman pojdzie daloka nie kožny.

Kali nie chočacca zajmacca pytańniami afarmleńnia kartki, možna źviarnucca da pasiarednikaŭ. Jany zvyčajna prosiać kala 10% ad koštu tavaru, ale nie mienš za $10. U takim vypadku vy pieradaście im pry sustrečy zakład, a jany apłaciać vyjhrany łot svajoj kartkaj. Za dadatkovuju apłatu možna daručyć pasiaredniku znajści patrebny tavar i paŭdzielničać u aŭkcyjonie.

0

0

0

0

0

0

Jahor Marcinovič

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH