Alaksandr Łukašenka siońnia ŭ chodzie rabočaj pajezdki ŭ Mahiloŭskuju vobłaść daručyŭ uradu naładzić u Biełarusi efiektyŭnuju sistemu pa zbory i pierapracoŭcy druhasnaj syraviny.
«Adpaviednaja prahrama pavinna być stvorana va ŭradzie. Chopić zajmacca šarłatanstvam, — skazaŭ Alaksandr Łukašenka. — Usio treba raśpisać, i daviadzicie kožnamu raj- i harvykankamu, administracyjam haradoŭ. Para ich nahružać hetymi zadačami».
Razmova ab nieabchodnaści naviadzieńnia vialikaha paradku ŭ hetym pytańni zajšła ŭ čas naviedvańnia Łukašenkam papiarovaj fabryki «Spartak» u Škłovie, na jakoj byŭ realizavany inviestycyjny prajekt pa techničnamu pieraasnaščeńniu i rekanstrukcyi. Novyja mahutnaści pradpryjemstva patrabujuć i vialikich abjomaŭ syraviny, jakoj u tym liku źjaŭlajecca makułatura.
Jak dałažyŭ jamu staršynia kancerna «Biellespapierapram» Uładzimir Šulha, u 2012 hodzie ŭ Biełarusi płanujecca sabrać 230 tys.t makułatury, u toj čas jak patrebnaść u joj pa halinie ŭ cełym składaje amal 300 tys.t u hod. Pavodle padlikaŭ, u Biełarusi štohod utvarajecca bolš jak 0,5 młn.t hetaj syraviny. Takim čynam, pieršačarhovaja zadača zaklučajecca ŭ nieabchodnaści pavieličeńnia abjomaŭ narychtoŭki makułatury. Adnak, pavodle słoŭ Uładzimira Šulhi, nie mienš važnyja taksama sarciroŭka i ŭpakoŭka hetaj syraviny. Ciapier u Biełarusi makułatura ŭ asnoŭnym zdajecca navałam biez raździaleńnia papiery pa jaje jakaści. Urad prapanuje pieradać funkcyi pa zboru makułatury novamu apierataru — Minžyłkamhasu, tamu što ŭ hetaha ministerstva jość nieabchodnaja baza dla hetaj raboty.
«U budučym hodzie treba ŭ abaviazkovym paradku narychtavać 300 tys.t. Heta nie prablema, i pa 50 tys.t u pieršyja try hady pavinny dabaŭlać. Heta datyčycca i inšych napramkaŭ», — daručyŭ Alaksandr Łukašenka. Pry hetym jon adznačyŭ, što nieabchodna naładzić efiektyŭny zbor druhasnaj syraviny i pa inšych napramkach, takich jak mietałałom, škło. U jakaści prykładu paśpiachovaj raboty ŭ hetym pytańni jon pryvioŭ vopyt minułych hadoŭ, kali ŭ tym liku navučency škoł byli zadziejničany ŭ hetym pracesie.
«My źbirali vialikuju kolkaść i mietałałomu, i makułatury. Para da hetaha viarnucca. Tamu pavinna być adpaviednaja prahrama», — skazaŭ jon.
«Pa druhasnaj syravinie ŭ nas koń nie valaŭsia», — padkreśliŭ Alaksandr Łukašenka, adznačyŭšy pry hetym, što, naprykład, u šerahu zachodnich krain z druhasnaj syraviny vyrablajecca značnaja dola pradukcyi.
