Pra heta paviedamiŭ staršynia savieta Respublikanskaha hramadskaha abjadnańnia «Pierśpiektyva» Anatol Šumčanka.
Červieński rynak Minska płanavałasia zakryć 15 studzienia 2012 hoda ŭ suviazi z rekanstrukcyjaj. Jaje na hetaj terytoryi budzie vykonvać iranskaja kampanija «Dzidas» na padstavie pahadnieńnia i inviestycyjnaha dahavora. Letam hetaha hoda sa staršynioj Minharvykankama Mikałajem Ładućkam pradprymalnikami Červieńskaha rynku było ŭzhodniena, što dla ich padrychtujuć novuju placoŭku ŭ mikrarajonie Łošyca, kudy pradprymalniki zmohuć pierajechać da pačatku rekanstrukcyi rynku.
Pavodle słoŭ Šumčanki, hrupa pradprymalnikaŭ Červieńskaha rynku na dniach pabyvała na pryjomie ŭ namieśnika staršyni kamiteta ekanomiki Minharvykankama, načalnika ŭpraŭleńnia pradprymalnictva Alaksandra Kalinoŭskaha. «Na pryjomie Kalinoŭski prapanavaŭ pradprymalnikam pierajechać na inšyja rynki, a kali budzie pabudavana niejkaja placoŭka, tady ich tudy pieraviazuć», — skazaŭ lidar «Pierśpiektyvy».
U adkaz Kalinoŭskamu nahadali słovy Ładućki, jaki raniej zapeŭnivaŭ, što pradprymalniki Červieńskaha rynku buduć pierasieleny na novuju placoŭku tolki tady, kali jana budzie vyznačana i padrychtavana.
5 kastryčnika na Červieńskim rynku taksama prajšoŭ schod pradprymalnikaŭ, na jakim prysutničaŭ dyrektar rynku Mikałaj Chmialnicki.
Jak skazaŭ Šumčanka, dyrektar staŭ tłumačyć pradprymalnikam, što «siońnia viaducca padrychtoŭčyja raboty dla budaŭnictva novaha rynku». «Ale rynku niama ŭ kłasičnym razumieńni, a nibyta buduć pabudavany dva budynki, u jakija pieraviazuć pradprymalnikaŭ, ale tam nie budzie nijakich boksaŭ. Zusim niezrazumieła, jakim čynam jany pabuduć hetyja dva budynki da 15 studzienia», — zaznačyŭ Šumčanka.
«Atrymlivajecca, što ničoha nie vyrašana. Ładućka kaža, što haradskija ŭłady nas nie kinuć; Kalinoŭski raić pierajazdžać na inšyja rynki: Chmialnicki zajaŭlaje, što ŭžo ŭzhadniajuć hetyja budynki, ale kali jany buduć uzhodnienyja — nieviadoma», — zaznačyŭ lidar «Pierśpiektyvy» i dadaŭ, što pradprymalniki znachodziacca «ŭ stanie niavyznačanaści i aburajucca».
Pavodle jaho słoŭ, «kali situacyja tak budzie składvacca, to pradprymalniki zastanucca ni z čym».
Kiraŭnik «Pierśpiektyvy» źbirajecca vykłaści situacyju ŭ tekście zvarotu, jaki płanujecca nakiravać va ŭrad i Administracyju prezidenta.
«Heta asabliva aktualna ŭ śviatle zajaŭ Snapkova i Miaśnikoviča (ministr ekanomiki i premjer ministr. — BiełaPAN.) ab roli i ŭdziele małoha biźniesu ŭ raźvićci ekanomiki krainy. Pradprymalniki nie supraćpastaŭlajuć siabie inviestaru, jaki ŭkładvaje miljony dołaraŭ u prajekt rekanstrukcyi rynku. My prosta chočam zachavać svaje pracoŭnyja miescy, brend Červieńskaha rynku i bieź vialikich strat pierajechać na miesca, uzhodnienaje z Ładućkam», — reziumavaŭ Šumčanka.
