Siarod haradoŭ Biełarusi najbolš chutka rastuć Fanipal, Naroŭla i Łahojsk — z 1999 pa 2009 hod kolkaść nasielnictva ŭ ich pavialičyłasia bolš jak na 10 pracentaŭ. U vaśmi haradach respubliki pryrost nasielnictva skłaŭ ad 5 pracentaŭ da 10 pracentaŭ — u Minsku, Zasłaŭi, Hrodnie, Breście, Čačersku, Smalavičach, Žłobinie i Dziaržynsku.
Ab hetym paviedamili ŭ infarmacyjnym centry JUNFPA «Śviet siami miljardaŭ», hruntujučysia na danych Nacyjanalnaha statystyčnaha kamiteta.
U 2009 hodzie ŭ Biełarusi było 112 haradoŭ. Amal dźvie treci ź ich — z kolkaściu nasielnictva mienšaj za 20 tys. čałaviek. U 12 haradach krainy naličvałasia bolš za 100 tys. žycharoŭ. Darečy, za 10 hadoŭ pamiž pierapisami nasielnictva takich haradoŭ stała na dva mienš: sa statusam statysiačnikaŭ daviałosia raźvitacca Lidzie i Navapołacku.
Pavodle danych pierapisu 2009 hoda,
u haradach pražyvała 7 młn. 65 tys. čałaviek.Heta na 103 tys. čałaviek bolš, čym u 1999 hodzie. Za dziesiacihodździe pamiž apošnimi pierapisami dola haradžan u ahulnaj kolkaści nasielnictva Biełarusi ŭzrasła z 69 pracentaŭ da 74 pracentaŭ.
Istotna pavialičyłasia kolkaść minčan. U 2009 hodzie ŭ Minsku pražyvała 1 młn. 837 tys. čałaviek. Pryrost kolkaści staličnych žycharoŭ za 10 hadoŭ skłaŭ 156 tys. čałaviek, abo 9 pracentaŭ, pryčym dźvie treci pryrostu prypadaje na žančyn. Kali ŭ 1999 hodzie kožny šosty žychar respubliki byŭ minčaninam, to ŭ 2009 hodzie — amal kožny piaty.
Rost kolkaści nasielnictva naziraŭsia va ŭsich abłasnych centrach respubliki, adnak pakazčyki jaho istotna adroźnivalisia. Tak, kolkaść žycharoŭ Bresta z 1999 pa 2009 hod pavialičyłasia na 8 pracentaŭ, a kolkaść žycharoŭ Mahilova — mienš jak na 1 pracent.
U stalicy žyvie prykładna stolki ž čałaviek, kolki ŭ abłasnych centrach Biełarusi razam uziatych. U šaści abłasnych centrach skancentravana 52 pracenty haradskoha nasielnictva našaj krainy.
Uzrovień zaniataści ŭ haradach vyšejšy, čym u sielskaj miascovaści, i jašče vyšejšy — u stalicy. Hety pakazčyk za 10 hadoŭ uzros va ŭsich rehijonach.
Dola nasielnictva ŭ pracazdolnym uzroście ŭ haradach vyšejšaja, čym u sielskaj miacovaści, a ŭ Minsku — vyšejšaja, čym u siarednim u haradach Biełarusi. Za 10 hadoŭ hety pakazčyk pavialičyŭsia pa ŭsioj krainie i dasiahnuŭ 61,6 pracenta ŭ siarednim pa respublicy, 53,4 pracenta — u sielskaj miascovaści, 64,4 pracenta — u haradskich pasieliščach i 66,1 pracenta — u Minsku.
Dola ludziej va ŭzroście starejšym za pracazdolny taksama vyšejšaja ŭ haradach. U 1999 hodzie ŭ haradskich pasieliščach pražyvała krychu bolš za pałavinu nasielnictva krainy va ŭzroście 60 hadoŭ i starejšyja. U 2009 hodzie ŭžo 63 pracenty ludziej u hetym uzroście byli haradžanami.
