Avijakampanija SAS admianiła rejs u Čykaha z-za vyjaŭleńnia myšy ŭ sałonie svajho avijałajniera pry pasadcy pasažyraŭ u Stakholmie.
Hryzun byŭ zaŭvažany ŭ aŭtorak u sałonie samalota A-330 niezadoŭha da pasadki pasažyraŭ. Myš biehała pa prachodzie pamiž kresłami. Pa słovach pradstaŭnika kampanii, žyviolinu nie zdoleli złavić, niahledziačy na dbajnyja pošuki i ŭstanoŭku šmatlikich pastak. Rašeńnie ab admienie rejsa było vyklikana nie tolki mahčymaj niezadavolenaściu pasažyraŭ, ale taksama i ryzykaj taho, što myš mahła pierahryźci elektrapravodku ŭ samalocie.
Jak zajaviŭ pradstaŭnik SAS, usie 250 pasažyraŭ, jakija zatrymalisia ŭ aeraporcie Stakholma, prajavili razumieńnie, a kampanija prykładaje ŭsie namahańni, kab adpravić ich inšymi rejsami.
Adnak zachopleny myššu samalot — adzin z najbujniejšych avijałajnieraŭ, što naležyć kampanii i znajści jamu zamienu budzie składana. Amierykanskija turysty Džejms Roŭč i Mery Ałsvahier praviali ŭ čarzie na novy rejs bolš za piać hadzin. «Heta samaja darahaja myš u historyi čałaviectva», — pažartavaŭ Džejms Roŭč.
Na samaj spravie takoje adbyvajecca nie ŭpieršyniu ŭ historyi hramadzianskaj avijacyi. U listapadzie 2009 hoda myšy na borcie dvuch samalotaŭ amierykanskaj avijakampanii Delta prymusili admianić dva rejsy ź Ńju-Jorka ŭ Łondan.
