Siońnia ŭ Maskoŭski RUUS Minska zabrali jašče troch aktyvistaŭ «Jeŭrapiejskaj Biełarusi» Andreja Bažynu, Andreja Mołčana i Daniłu Hančarova.
Jak paviedamili ŭ hramadźniaskaj kampanii «Jeŭrapiejskaja Biełaruś», u maładych ludziej na kvaterach praviali pieratrusy. Zabrali kampjutarnuju techniku. Milicyjanty skazali zatrymanym, što ich buduć dapytvać pa spravie padału Doma pravasudździa.
Nahadajem, što ŭ noč paśla vyniasieńnia prysudu eks-kandydatu ŭ prezidenty Andreju Sańnikavu była sproba padpalić Dom pravasudździa. U budynak kinuli niekalki «kaktejlaŭ Mołatava». Na miescy zdareńnia apieratyŭnyja rabotniki znajšli butelku z haručaj vadkaściu i frahmienty jašče troch raźbitych butelek.
Ahniom usiaho tolki paškodžany dźviery słužbovaha ŭvachodu. Pa fakcie padpału zaviedziena kryminalnaja sprava pa č.2 art. 339 KK (złosnaje chulihanstva).
Pa spravie ŭžo dapytali aktyvistaŭ «Jeŭrapiejskaj Biełarusi» Jaŭhiena Asinskaha, Aleha Sielivanava, Ułada Bierazoŭskaha, Alaksandra Kudłajeva z synam, Hieorhija Rusaka, Aleha Jarasieniu, Mikitu Vielikaborca i aktyvista kampanii «Bieźjadziernaja Biełaruś» Arsienia Hurskaha. Usie jany adpuščany. Dopyty pravodzili milicyjanty i supracoŭniki KDB.
14 maja ŭ sudzie Partyzanskaha rajona Minska (Dom pravasudździa) byŭ vyniesieny prysud Andreju Sańnikavu, kaardynataru hramadzianskaj kampanii «Jeŭrapiejskaja Biełaruś».
