Jeŭraparłamient zaklikaŭ Jeŭrakamisiju, Radu ES i krainy — partniory Jeŭrasajuza «pašyryć abmiežavalnyja miery ŭ dačynieńni da biełaruskaha režymu, u tym liku ŭvieści kropkavyja ekanamičnyja sankcyi ŭ dačynieńni pradpryjemstvaŭ, jakija naležać dziaržavie».Pra heta havorycca ŭ rezalucyi ab situacyi ŭ Biełarusi, pryniataj 12 maja na siesii ŭ Strasburhu. Tekst dakumienta apublikavany na aficyjnym sajcie Jeŭraparłamienta.
U rezalucyi rašuča asudžajucca usie abvinavačańni, pradjaŭlenyja pa spravie ab masavych biesparadkach, jakuju Jeŭraparłamient nazvaŭ palityčna matyvavanaj. U dakumiencie taksama adznačajecca, što
ŭsie abvinavačvańni suprać kandydataŭ u prezidenty Uładzimiera Niaklajeva, Vitala Rymašeŭskaha, Mikałaja Statkieviča, Dźmitryja Vusa i Andreja Sańnikava źjaŭlajucca «niezakonnymi i niedapuščalnymi».
JEP taksama asudziŭ prajaŭlenuju biełaruskimi ŭładami niepavahu da pravoŭ hramadzian na svabodu schodaŭ i svabodu słova i zaklikaŭ da
nieadkładnaha i biezumoŭnaha vyzvaleńnia ŭsich zatrymanych pa spravie ab masavych biesparadkach.
Jeŭraparłamient vykazaŭ zaniepakojenaść u suviazi z paharšeńniem stanovišča pravaabaroncaŭ u Biełarusi. U pryvatnaści, u rezalucyi rašuča
asudžajucca Alaksandr Łukašenka i šerah žurnalistaŭ dziaržaŭnych ŚMI, jakija nazvali staršyniu niezarehistravanaj pravaabarončaj arhanizacyi «Viasna» Alesia Bialackaha «piataj kałonaj ŭ krainie». Rezalucyja asudžaje «atmaśfieru strachu i zapałochvańnia palityčnych apanientaŭ» u Biełarusi.
U dakumiencie Jeŭraparłamient taksama asudžaje cisk i pieraśled z boku ŭładaŭ u dačynieńni niezaležnych žurnalistaŭ i ŚMI.
Jeŭraparłamient zaklikaŭ spynić inicyjavanuju Ministerstvam infarmacyi praceduru zakryćcia haziet «Narodnaja Vola» i «Naša Niva», źniać abmiežavańni pa dostupie da sajtaŭ«Chartyja-97» i «Biełaruski partyzan», a taksama vyzvalić žurnalista Andreja Pačobuta.
