Eks-kandydat u prezidenty Andrej Sańnikaŭ zajaviŭ siońnia ŭ sudzie, što davaŭ pakazańni ŭ SIZA KDB pad katavańniami. Faktyčna, jon paŭtaryŭ toje, što kazaŭ raniej Aleś Michalevič. Maci Sańnikava zapłakała, kali słuchała heta.
«Mocna źbitaha mianie advieźli ŭ SIZA, pratrymali piać hadzin u pamiaškańni biez mahčymaści navat schadzić u tualet. Potym pieraviali ŭ kamieru bieź miescaŭ, pad narami, z chvoraj nahoj, tam było vielmi ciažka znachodzicca».
U kamiery vielmi choładna, — raskazaŭ jon. — Navat kali dali miesca, to lažaŭ tvaram da śviatła, prymušali nie mianiać pozy. Kali ja zasynaŭ i pieravaročvaŭsia ŭ śnie, to budzili ŭsiu kamieru i prymušali lehčy ŭ tuju ž pozu.
Znoŭ pieraviali ŭ inšuju kamieru, pad nary. Ciabie vyvodziać z kamiery z usimi rečami — matrac, paścielnyja prynaležnaści, honiać pa krutoj leśvicy ŭniz, ludzi ŭ maskach. Jany byli dobra padrychtavanyja, ahresiŭnyja. Kałociać dubinkami pa leśvicy, ścienach, kryčać niečałaviečymi hałasami. Zavodziać u sutareńni, dzie raździavajuć dahała. Staviać na raściažku da ścienki. Prymušajuć prysiadać, niahledziačy na toje, što ŭ mianie chvoraja naha.
Potym dazvalajuć adziecca. U prysutnaści troch čałaviek u mascy. Takoje rabiłasia štodzionna. Ja byŭ pazbaŭleny prava na pierapisku.
Ludzi ŭ maskach dazvalali ŭdary dubinkami pa śpinie, tyčki. Ja byŭ u skockim stanie, pad narami, z chvoraj nahoj.
Rekamiendavali pisać zajavu na imia Łukašenki, jak inšych kandydataŭ. Ja daviedaŭsia, što majho syna chacieli skraści słužby apieki. Mnie było skazana KDBšnikami, kali ja chaču dapamahčy žoncy, to ja pavinien davać pakazańni.
«31 śniežnia ŭ mianie była prymusovaja hutarka z staršyniom KDB Vadzimam Zajcavym, jaki pahražaŭ žyćciom i zdaroŭjem žonki i dziciaci. Kali ja admoviŭsia, to Zajcaŭ skazaŭ, što suprać ich buduć bolš žorstkija mietady. Ja byŭ uražany. I zrazumieŭ, što ad mianie zaležyć žyćcio žonki i dziciaci.
Voś što, pa słovach Sańnikava, było dalej:
«Potym staŭ pracavać apieratyŭnik Fiacisaŭ, jaki, zhodna z zajaŭlenymi Zajcavym temami, rychtavaŭ mianie da dopytaŭ, kazaŭ, jakija temy jaho cikaviać: pytańni finansavańnia, kantaktaŭ z zamiežnikami. Pierad pieršym dopytam było abumoŭlena, jak ja pavinien aśviatlić tyja ci inšyja temy.
Fiacisaŭ pryjšoŭ, kab pierakanacca, što ja budu davać nieabchodnyja pakazańni. Byŭ składzieny padrabiazny płan majho dopytu i papiaredziŭ, što spasyłki na Kanstytucyju, što ja admaŭlajusia ad pakazańniaŭ, nie buduć prymacca.
U mianie mocna zabaleła piečań pierad pieršym dopytam. Ale ja bajaŭsia, što mahu dać pakazańni, jakija dapamohuć žoncy. Mnie było admoŭlena ŭ advakackaj abaronie.
Upieršyniu 22 sakavika
Navat maje patrabavańni dać mnie dakumienty, Kanstytucyju i Usieahulnuju dekłaracyju pravoŭ čałavieka nie byli zadavolenyja.
Advakatu na dopytach advodziłasia rola statysta. Zabaraniali navat hladzieć na advakata. Na ŭsich dopytach u mianie było drennaje samaadčuvańnie, ale ja nie admaŭlaŭsia davać pakazańni.
Padčas usich dopytaŭ byŭ fizičny i psichałahičny cisk.
Ciapier ja tłumaču, čamu maje pakazańni ŭ chodzie papiaredniaha śledstva nie supadajuć z tymi, što ja daju ciapier».
Praces Sańnikava praciahniecca zaŭtra, 13 maja. U 10.00 pačnucca sudovyja sprečki.
