«Patrabujem nieadkładnaha vyzvaleńnia Andreja Pačobuta i źniaćcia ŭsich abvinavačańniaŭ suprać jaho», havorycca ŭ zakliku redakcyi polskaj «Hazety Vyborčej», biełaruskim karespandentam jakoj źjaŭlajecca žurnalist Andrej Pačobut.
Ciapier jon znachodzicca ŭ śledčym izalatary Haradzienskaj turmy. Jahonyja kalehi nazyvajuć falšyvymi abvinavačańni «suprać žurnalista, jaki dabrasumlenna vykonvaŭ svaje abaviazki».
U svaim zvarocie redakcyja zaznačaje, što Pačobut byccam by abraziŭ prezydenta Łukašenku ŭ vaśmi artykułach u «Vyborčej» i dvuch kamentarach u internecie, za što jamu pahražajuć dva hady źniavoleńnia. Jašče bolš — čatyry hady źniavoleńnia jamu pahražajuć, što jon «ździejśniŭ paklop». Adnak KDB i prakuratura kankretna nie paviedamili, čamu vyrašyli, što žurnalist parušyŭ zakon. «Tak vyhladajuć siońnia demakratyja i svaboda słova ŭ Biełarusi»,- padsumoŭvajuć polskija žurnalisty.
«Čamu Andreja Pačobuta praciahvajuć trymać za kratami? Tamu što «ŭłady ŭ Miensku bajacca jahonaj advahi, niazłomnaści i ćviarozaj acenki sytuacyi ŭ Biełarusi, jakuju vykazvaŭ na staronkach «Hazety»,- havorycca dalej u redakcyjnym zakliku.«Takim čynam represii zakranajuć taksama žonku i dvuch małych dziaciej Pačobuta. Ichniajaia „vina“ ŭ tym, što jany źjaŭlajucca siamjoju žurnalista, jaki nikudy nie źbiraŭsia ŭciakać i źjaŭlaŭsia na kožny vyklik śledčych. Tak dziejničali ułady SSSR u stalinskija časy»,- padsumoŭvajuć kalehi Andreja Pačobuta.
Hety dakument razasłany ŭ mižnarodnyja žurnalisckija arhanizacyi, u arhanizacyi, jakija zajmajucca abaronaj pravoŭ čałavieka, u zamiežnyja medyi i palitykam. Kali pad im buduć sabranyja podpisy, jaho pieradaduć u biełaruskuju ambasadu ŭ Varšavie.
Nahadajem taksama, što ŭ Biełarusi pačaŭsia zbor podpisaŭ pad chadajnictvam ab źmienie miery strymańnia Andreju Pačobutu.
