8 krasavika śledčy pa najvažniejšych spravach Hrodzienskaj abłasnoj prakuratury Arsień Mikolski naviedaŭ Andreja Pačobuta ŭ izalatary, dzie ŭ prysutnaści advakata pradjaviŭ jamu abvinavačańnie pa adnoj kryminalnaj spravie i paviedamiŭ pra raspačynańnie druhoj.Jak paviedamiŭ pres-słužbie HA «BAŽ» advakat žurnalista Alaksandr Biaryłaŭ, abvinavačańnie vystaŭlena pa artykule «Abraza prezidenta RB» (č.1 art. 368 KK), a novaja kryminalnaja sprava ŭzbudžana za «Paklop na prezidenta RB» (art. 367 KK).
Dahetul Pačobut byŭ tolki padazravanym, i tolki pa artykule za «abrazu».
Spravu zavioŭ 18 sakavika 2011 h. prakuror Hrodzienskaj vobłaści Marozaŭ. Prakuratura paličyła, što Pačobut abražaŭ kiraŭnika dziaržavy na staronkach polskaj «Gazety Wyborczaj», sajta «Biełorusskij partizan» i svajho błoha poczobut.livejournal.com na praciahu 2010—2011 hh.
Novaja sprava za «paklop» zaviedziena 6 krasavika śledčym A. Mikolskim.
Pa słovach advakata, navina pra ŭzbudžeńnie čarhovaj kryminalnaj spravy nie dezaryjentavała žurnalista. «Pačućcie ŭ jaho bajavoje, jon da ŭsiaho hatovy», — zaznačyŭ A. Biaryłaŭ.
Termin zatrymańnia Pačobuta skančajecca ŭviečary 9 krasavika. Kali mieru strymańnia ŭ dačynieńni da jaho nie zrobiać bolš žorstkaj, to žurnalista majuć vyzvalić.
Nahadajem, što ŭviečary 6 krasavika Pačobuta, jaki znachodziŭsia pad padpiskaj ab niavyjeździe, zatrymali http://baj.by/m-p-viewpub-tid-1-pid-10351.html za namier pryjechać z Hrodna ŭ Minsk. Śledstva paličyła, što, pakinuŭšy miesca žycharstva, Pačobut budzie pieraškadžać praviadzieńniu śledčych dziejańniaŭ u ramkach kryminalnaj spravy. Ź izalatara žurnalista majuć vyzvalić uviečary 9 krasavika.
«Upieršyniu my sutyknulisia z pryciahnieńniem žurnalistaŭ da adkaznaści pa hetych artykułach jakraz na Hrodzienščynie — heta była Markievič i Mažejka, — uzhadvaje staršynia BAŽ Žanna Litvina. — Heta supravadžałasia jašče i zakryćciom haziet, takich jak «Pahonia», «Birža informacii»… Pradjaŭleńnie novych abvinavačańniaŭ pa kryminalnym artykule navodzić na dumku pra patałahičnuju nieciarpimaść i nieŭsprymańnie hrodzienskimi ŭładami idei svabody słova, niezaležnaj žurnalistyki. U toj ža čas, adkrytaść i pryncypovaść u prafiesijnaj dziejnaści, adsutnaść strachu ŭ žurnalista — heta tyja jakaści, što vyklikajuć vialiku pavahu da Andreja. Mienavita hetaj pavahaj byŭ pradyktavany zvarot našych hrodzienskich kalehaŭ u abłasnuju prakuraturu. Zachady, užytyja da Andreja Pačobuta, jašče bolš pahłyblajuć supraćstajańnie niezaležnaj žurnalisckaj supolnaści i dziaržaŭnych struktur».
