Pierad vybarami kiraŭnik krainy abiacaŭ biełarusam załatyja hory. «NN» paraŭnała abiacańni vosieni-2010 z rečaisnaściu viasny-2011 i vyjaviła try najbolš pravalnych ź ich.
1. Umacavać nacyjanalnuju valutu. Buduć zabiaśpiečanaja stabilnaść kursu biełaruskaha rubla, absalutnaja zachavanaść pryvatnych układaŭ, dastupnaść bankaŭskaha kredytu.
Za try miesiacy 2011 hoda rubiel byŭ devalvany na 7%, a banki susiednich krain uvohule panizili vartaść biełaruskaj valuty na 20% i bolš. U krainie nazirajecca deficyt valuty — nabyć navat drobnyja sumy ŭ jeŭra i dołarach ŭ abmieńnikach Biełarusi nadzvyčaj prablematyčna. Nasielnictva masava pazbaŭlajecca ad rubloŭ — u bankach skuplajuć navat kiłahramovyja załatyja źlitki.
2. Stać bahaciejšymi. Čym bahaciejšy čałaviek — tym bahaciejšaja kraina. Za košt rostu ekanomiki budzie zabiaśpiečany pastajanny rost zarabotnaj płaty, piensij, stypiendyj, ich poŭnaja i svoječasovaja vypłata.
Inflacyja ŭ 2011 hodzie ŭžo skłała prykładna 5%. Paliva dvojčy daražeła na 10% ad papiaredniaha koštu kožny raz. Siaredni miesiačny zarobak biełarusaŭ, u pieraliku na realny kurs dołara i jeŭra, źniziŭsia amal na 15–20%.
3 Stvaryć novaje abličča biełaruskaj ekanomiki. Na praciahu bližejšych piaci hadoŭ u krainie budzie realizavana nie mienš za 100 mahutnych inviestycyjnych prajektaŭ. Źjaviacca novyja haliny: kaśmičnaja, nana- i bijatechnałohii, alternatyŭnaja enierhietyka i inšyja. Heta novyja vytvorčaści, novyja technałohii, novyja pracoŭnyja miescy, zapatrabavanyja na rynku pracy, rost ekspartu. Sielskaja haspadarka stanie prybytkovym ahrabiznesam. Ekspart sielhaspraduktaŭ budzie pavialičany bolš čym u dva razy — da 7 miljardaŭ dalaraŭ u hod.
U realnaści pa stanie na krasavik 2011 biełaruskaja ekanomika zaležyć ad miljardnaha rasijskaha kredytu, jaki dazvolić joj pratrymacca jašče niekalki miesiacaŭ na raniejšym uzroŭni. Adno ź viadučych pramysłovych pradpryjemstvaŭ krainy — MAZ — moža faktyčna trapić pad kantrol svajho hałoŭnaha kankurenta — rasijskaha KamAZa. Zamiežnyja inviestary masava pradajuć svoj biznes u Biełarusi. A ŭ śfiery enerhietyki pabudova AES pa rasijskaj technałohii jašče bolš uzmacnić i biez taho niebiaśpiečnuju zaležnaść ad adnaho susieda.
