Advakat Iryna Burak 15 sakavika zmahła na praciahu troch hadzin pahutaryć sam-nasam sa svaim padabaronnym Alaksandram Kłaskoŭskim, jaki abvinavačvajecca pa kryminalnaj spravie ab masavych biesparadkach u Minsku 19 śniežnia.
Heta pieršy paśla padziej 19 śniežnia vypadak, kali pradstaŭniku abarony dali mahčymaść tak doŭha pahutaryć sam-nasam z adnym z abvinavačvanych pa spravie ab masavych biesparadkach. Dahetul u KDB spasyłalisia na adsutnaść svabodnych pamiaškańniaŭ dla takich sustreč.
«Raniej advakat nie adzin raz biezvynikova prasiedžvała sa svajoj zajaŭkaj-orderam u pryjomnaj KDB, ale kali pryjšła siońnia, to joj raptam skazali, što ŭ SIZA jość svabodnaje pamiaškańnie dla sustrečy z padabaronnym», — paviedamiŭ baćka abvinavačvanaha, viadomy žurnalist i palitołah Alaksandr Kłaskoŭski.
Pavodle jaho słoŭ, abmiežavańniem pa časie sustrečy advakata ź jaho synam faktyčna stała tolki zakančeńnie pracoŭnaha dnia.
«Saša trymajecca badziora, navat sprabuje žartavać, ale dobraha, viadoma, mała.
Jon skazaŭ, što maralna hatovy da vialikaha terminu źniavoleńnia, pakolki abvinavačvajecca nie tolki va ŭdziele, ale i ŭ arhanizacyi masavych biesparadkaŭ», — skazaŭ
Kłaskoŭski-starejšy.
Ranicaj 15 sakavika žurnalist paviedamiŭ BiełaPAN, što atrymaŭ ad syna pieršy list. Pavodle jaho słoŭ, hety fakt, jak i sustreča z advakatam, stali sur`ioznym praryvam, pieradusim infarmacyjnaj błakady.
Kłaskoŭski-starejšy źviazvaje heta z tym, što 11 sakavika hazieta «Narodnaja vola» apublikavała jaho adkryty list na imia hienieralnaha prakurora Ryhora Vasileviča. Baćka aryštavanaha zapatrabavaŭ zabiaśpiečyć synu mahčymaść narmalna vieści pierapisku i sustrakacca z advakatam. Akramia taho, žurnalist nie vyklučaje, što svaju rolu mahło syhrać znachodžańnie ŭ Minsku prem`jer-ministra Rasii Uładzimira Pucina. Napiaredadni pryjezdu da jaho źviarnulisia svajaki fihurantaŭ kryminalnaj spravy ab masavych biesparadkach z prośbaj «zrabić realnyja zachady, kab paspryjać vyzvaleńniu biełaruskich viaźniaŭ sumleńnia».
BiełaPAN
Chočaš padzialicca važnaj infarmacyjaj ananimna i kanfidencyjna?
Pišycie redaktaru «Našaj Nivy» ŭ TH
