Sumar asabista pakaraŭ strełačnikaŭ za «Junimiłk» 3

Pradpryjemstva kampanii «Danon-Junimiłk» u Pružanach naklikała hnieŭ Łukašenki.

Staršynia Bresckaha abłvykankama Kanstancin Sumar asabista prybyŭ u Pružanski rajon, kab vykanać daručeńnie Łukašenki ab pakarańni «vinavatych» u praźmiernaj biznes-aktyŭnaści kampanii «Danon-Junimiłk» u Biełarusi.

Nahadajem, što raniejšy dyrektar Pružanskaha małakazavoda vystupaŭ kateharyčna suprać prodažu svajho pradpryjemstva rasijska-francuzskaj kampanii. Tady jaho prosta zvolnili, kab zamoŭk. Ciapier ža Uładzimira Mikiciča viarnuli na zavod z počaściami.

— Kab nie było nijakich pahałosak, adrazu ž paviedamlu: za niedastatkovuju rabotu z kadrami i niematyvavanaje zvalnieńnie dyrektara Pružanskaha małočnaha kambinata Uładzimira Mikiciča staršyni Pružanskaha rajvykankama Alaksandru Jurkieviču abvieščanaja vymova, — cytuje kiraŭnika vobłaści hazieta «Viečiernij Briest».

Sumar taksama zvolniŭ namieśnika staršyni Pružanskaha rajvykankama Vasila Kazaka. Kazak kuryravaŭ pytańni ekanomiki.

Vinavatym, jak zaŭsiody, akazalisia «strełačnik».

Choć inviestara z «Junimiłka» pryciahvali na samym vysokim uzroŭni. Zhodu na inviestycyi davaŭ Łukašenka asabista.

Prychod «Junimiłka», pavodle čutak, łabiravaŭ staršynia Nacbanka Piatro Prakapovič. Małako na zavody «Junimiłka» pradavali haspadarki Nacbanka, u tym liku cantralnaja — «Mačuliščy».

Adnak na peŭnym etapie inviestar nie schacieŭ rabić abiacanych bolšych inviestycyj, vyrašaŭ abmiežavacca pierapracoŭkaj małaka na ŭžo najaŭnych mahutnaściach. Heta i vyklikała sankcyi.

A mahčyma, sprava ŭvohule była palityčnaj. «Danon-Junimiłk» — kampanija z udziełam francuzskaha i rasijskaha kapitału. Takim čynam, paśla vybaraŭ sihnał pajšoŭ na zachad i ŭschod: los inviestycyj budzie rašać Łukašenka asabista.

Pružanskija ž hałovy akazalisia prosta ščepkami, jakija latuć, kali drevy siakuć.

Siarhiej Hiezhała

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH