U pieradapošni dzień zimy AAN vystupiła z sensacyjnym paviedamleńniem, maŭlaŭ, Biełaruś parušaje embarha na pastaŭki zbroi ŭ Kot-dJIvuar. Praz kolki dzion biełaruskija ŚMI źmiaścili abviaržeńnie i spasłalisia na bryfinh adnaho z kiraŭnikoŭ AAN, jaki vybačyŭsia za «škodu imidžu» krainy. Prablema tolki ŭ tym, što ŭ aryhinale i jaho vybačeńnie, i ŭsie vykazvańni sfarmulavanyja takim čynam, jaki značna mianiaje spravu.
Alen Lerua, kiraŭnik Departamentu miratvorčych aperacyjaŭ AAN (DMA) nie kazaŭ ani pra «škodu imidžu», ani «nijakaha samalota nie było», nasupierak śćvierdžańniam niekatorych biełaruskich ŚMI. Naadvarot, vykazvańni Lerua byli maksymalna abciakalnymi. Maŭlaŭ, było niedakładnaje paviedamleńnie – «inaccurate report» -- i vybačajcie.
Lerua paviedamiŭ: «Uviečary ŭ niadzielu Misija AAN u Kot-dJIvuary zajaviła, što jana atrymała infarmacyju ab tym, što latak, jaki ździajśniaŭ rejs, što adpaviadaje dadzienamu apisańniu, pryziamliŭsia ŭ Jamusukro. Zvažajučy na surjoznaść pytańnia, Misija pryniała rašeńnie apublikavać jaho».
Lerua nie tłumačyć, što ŭrešcie zdaryłasia – ci samalot nie prylacieŭ, ci šrubalotaŭ na im nie było, ci prosta miratvorcy nie dali rady vyśvietlić, u čym sprava. Zatoje zaznačyŭ, «mienavita Misija AAN u Kot-dJIvuary apublikavała pamyłkovaje paviedamleńnie (wrong report) i, u jakaści kiraŭnika DMA, ja, viadoma ž, biaru na siabie adkaznaść za heta», – zajaviŭ Alen Lerua, dadaŭšy, što takija niapravilnyja paviedamleńni AAN majuć miesca nadzvyčaj redka, a DMA nadaje vielmi vialikuju ŭvahu dakładnaści svaich paviedamleńniaŭ». Hetaja navina z pracytavanymi vykazvańniami dasiahalnaja ŭ asnoŭnaj anhielskamoŭnaj stužcy Słužby navinaŭ AAN.
Tekst ža, jaki byŭ pašyrany ŭ biełaruskich ŚMI pachodzić z rasiejskamoŭnaj stužki, redakcyja jakoj i raniej, byvała, «praviła» naviny. Zbolšaha, vidać, nienaŭmysna, ale byvała, što z rasiejskaj stužki źnikali kavałački mienavita pra parušeńni pravoŭ čałavieka ŭ Rasiei i byłym SSSR. Prykra tolki, nakolki niadbajna pastavilisia da infarmacyi pra hetaje afrykanskaje zdareńnie biełaruskija ŚMI. Sytuacyja nahadvaje žnivieńskuju historyju z «kačkaj» pra pastaŭku biełaruskich S-300 u Iran.
Pa-pieršaje,
sprava vyhladaje zusim nieadnaznačna, i całkam mahčyma, što niejkaje zdareńnie ź biełaruskim śledam usio-tki mieła miesca,adnak biełaruski bok patrapiŭ ad jaho adharadzicca. U svaju čarhu, sprava taja nie była nastolki istotnaj dla bujnych dziaržaŭ, kab niechta ŭsurjoz pačaŭ łavić biełarusaŭ «na haračym». Zhadajma, jak kolki hadoŭ tamu Francyja prypluščyła vočy na toje, jak biełaruskija najmity zrabili avijanalot na jaje bazu ŭ Kot-dJIvuary. Praŭda, tady heta byli pryvatnyja asoby biez žadnaha ŭradavaha ŭdziełu.
Pa-druhoje,
dahetul Biełaruś sapraŭdy – niahledziačy na śćvierdžańni niekatorych apazycyjnych ŚMI – nikoli nie była złoŭlenaja na niejkich niezakonnych abo ryzykoŭnych hiešeftach – kali nie ličyć zusim anekdatyčnych šlemafonaŭ dla tankistaŭ Sadama.Jość šmat zacikaŭlenych spekulacyjaŭ na hety kont, ale anijakich vyjaŭlenych faktaŭ.
Treba pryznać, što
Łukašenka nie ryzykuje ŭ mižnarodnym planie.Kali biełaruski bok i handluje zbrojaj, dyk u piekła nia lezie i sankcyjaŭ nie parušaje. Tamu i Iran, i Irak pry Sadamu, i Syryja i anijaki inšy vorah Ameryki dahetul aničoha niebiaśpiečnaha ŭ Mienska nie vyhandlavali, aproč verbalnych deklaracyjaŭ biełaruskaha lidera.
Viestki nakont mažlivych biełaruskich varušeńniaŭ u napramku Kot-dJIvuara dy Libii nie ŭkładajucca ŭ rečyšča dziejańniaŭ biełaruskaha režymu ciaham apošnich šasnaccaci hadoŭ. Kali jany praŭdzivyja, dyk jany śviedčać pra jaho transfarmacyju, stratu peŭnaj aściarožnaści nia mienš, čym padziei 19 śniežnia. Apošnim časam jakasna źmianiłasia nia tolki ŭnutranaja palityka krainy, ale i vonkavaja. Napramak evalucyi – u bok bolšaj biezahladnaści i samaŭpeŭnienaści.
Heta, vidać, dobra adčuvajuć i zamiežnyja dziaržavy, što sprabujuć cisnuć na Łukašenku. Pra toje śviedčać hetaksama krytyčnyja zajavy z boku roznych vysokapastaŭlenych kiraŭnikoŭ AAN na adras biełaruskaj dziaržavy paśla vybaraŭ – biezumoŭna, u vyniku aktyŭnaści pradstaŭnikoŭ zachodnich dziaržaŭ (a mo i nia tolki ich) u strukturach AAN. Zajavy ž Hieneralnaha sakratara ŭvohule nia mieli prykładaŭ u historyi niezaležnaj Biełarusi. Taki instrument cisku na aficyjny Miensk jak AAN u asobie jaje ńju-jorskaha načalstva vykarystoŭvajecca ŭpieršyniu i davodzić – hetym razam biełaruskaje kiraŭnictva dapiakło svaimi dziejańniami prynamsi niekatorym mahutnym dziaržavam.
Pakazalna, što navat Rasieja, nia kažučy ŭžo pra KNR, nie parupilisia baranić svajho «stratehičnaha partnera» ad ńju-jorskich AANaŭskich čynoŭnikaŭ.Ale praŭdapadobna, što zaraz biełaruskaje kiraŭnictva mała zvažaje na takija rečy. Jamu b, jak słušna zaznačyŭ Anatol Sidarevič, «aby dzień prastajać i noč pratrymacca».
