Staršynia Mahiloŭskaj abłasnoj arhanizacyi Partyi BNF Dźmitryj Sałaŭjoŭ i aktyvistka arhkamiteta pa stvareńni partyi «Biełaruskaja chryścijanskaja demakratyja» Taćciana Šambałava padali ŭ sud Leninskaha rajona skarhi na Upraŭleńnie KDB pa Mahiloŭskaj vobłaści, jakoje pastaviła ich na prafiłaktyčny ŭlik.
Nahadajem, Dźmitryj Sałaŭjoŭ byŭ pastaŭleny na prafiłaktyčny ŭlik 5 studzienia. Jak ukazana ŭ aficyjnym papiaredžańni, na ŭlik jaho pastavili za nieadnarazovyja sproby arhanizacyi i praviadzieńnia ŭ rehijonie niesankcyjanavanych masavych mierapryjemstvaŭ, jakija mahli paciahnuć hrubaje parušeńnie hramadskaha paradku. A taksama za ŭdzieł 19 śniežnia 2010 hoda ŭ Minsku ŭ niesankcyjanavanym mierapryjemstvie, u vyniku jakoha byli dapuščanyja masavyja biesparadki.
Taćciana Šambałava była pastaŭlenaja na prafiłaktyčny ŭlik 9 lutaha. Joj było ŭručana aficyjnaje papiaredžańnie za dziejnaść u składzie niezarehistravanaj va ŭstanoŭlenym paradku partyi «Biełaruskaja chryścijanskaja demakratyja» i ŭdzieł u niesankcyjanavanaj akcyi ŭ Minsku 19 śniežnia, što, na dumku supracoŭnikaŭ KDB, moža pryvieści da ŭčynieńnia złačynstvaŭ, praduhledžanych artykułami 193–1 i 293 KK.
Zhodna sa skarhaj Sałaŭjova, padčas prafiłaktyčnaj hutarki z supracoŭnikam KDB Andrejem Machunovym u jakaści dokazaŭ supraćpraŭnaj dziejnaści byli pryviedzienyja fakty ŭskładańnia Sałaŭjovym kvietak kala abłasnoha krajaznaŭčaha muzieja 25 sakavika, uskładańnia kvietak kala pomnika achviaram Čarnobyla 26 krasavika i ŭdzieł u padrychtoŭcy abłasnoj kaalicyjaj demakratyčnych sił prahramy śviatkavańnia Dnia Voli.
Sałaŭjoŭ nastojvaje, što pry praviadzieńni hetych mierapryjemstvaŭ nie było nijakich hrubych parušeńniaŭ hramadskaha paradku. Svajo znachodžańnia na płoščy Niezaležnaści ŭ Minsku 19 śniežnia jon tłumačyć vykanańniem prafiesijnych abaviazkaŭ jak karespandenta
Taćciana Šambałava ŭ svaju čarhu śćviardžaje, što supracoŭnik KDB Andrej Machunoŭ biezhruntoŭna nazvaŭ jaje «kiraŭnikom haradskoha adździaleńnia partyi «BCHD». «Hetyja śćviardžeńni nie adpaviadajuć rečaisnaści i źjaŭlajucca nieabhruntavanymi i niepraŭdzivymi vydumkami i zdahadkami, bo takoj partyi ŭ Respublicy Biełarusi nie isnuje. Nasamreč ja źjaŭlajusia mahiloŭskim kaardynataram arhanizacyjnaha kamiteta pa stvareńni partyi „BCHD“ i jaje zasnavalnikam i tamu zajmajusia dziejnaściu pa padrychtoŭcy jaje rehistracyi, jak praduhledžana zakonam „Ab palityčnych partyjach“, u pryvatnaści artykułam 10», — adznačaje Šambałava.
Aktyvistka ličyć, što joj nielha stavić u vinu fakt adnarazovaj prysutnaści 19 śniežnia ŭ Minsku na niesankcyjanavanym mierapryjemstvie, za što jana paniesła administracyjnaje spahnańnie, chacia nijakaha ŭdziełu ŭ masavych biesparadkach nie prymała.
Apazicyjaniery ŭpeŭnieny, što navat u ramkach administracyjnaha zakanadaŭstva pastanoŭka ich na ŭlik niezakonnaja, bo ŭ ich adsutničajuć jak minimum dva administracyjnyja spahnańni za tojesnyja abo adnarodnyja naŭmysnyja pravaparušeńni, učynienyja na praciahu hoda.
Sałaŭjoŭ i Šambałava siarod inšaha prosiać, kab sud admianiŭ vyniesienyja im papiaredžańni, pastanoŭku na prafiłaktyčny ŭlik, abaviazaŭ supracoŭnikaŭ KDB prynieści im prabačeńni za niezakonnyja, na dumku apazicyjanieraŭ, dziejańni.
