Hałoŭny redaktar «Aŭtaradyjo» raskazaŭ «Našaj Nivie», čamu siońniašni sudovy praces byŭ zakrytym.
— Padčas siońniašniaha pracesu sprava nie razhladałasia, prosta abodva baki ŭ čarhovy raz vykazali svaje pazicyi. Heta było dosyć karysna, bo arhumientacyi ŭ nas ciapier bolš, čym u minuły raz.
My źviarnulisia pa dapamohu da prafiesijnaha fiłołaha, kab vyśvietlić, ci źjaŭlajecca fraza «los krainy vyrašajecca nie na kuchni, a na płoščy» ekstremisckaj.U pryncypie, u pierakładzie na litaraturnuju movu atrymlivajecca «los krainy vyrašajecca nie kułuarna, a publična». Hetaja fraza z prahramy kandydata ŭ prezidenty Andreja Sańnikava drukavałasia, naprykład, u aficyjnaj presie. Pry žadańni, u jakoj zaŭhodna frazie možna znajści ekstremiscki zaklik — hałoŭnaje, pravilna šukać. Druhoje, u čym nas abvinavačvajuć — parušeńnie tvorčaj kancepcyi.
Havorka idzie pra tyja «słavutyja» 75% biełaruskaj muzyki. Reč u tym, što ni ŭ jakich pravavych aktach heta nie zafiksavana, i padličyć usio ŭ pracentach (asabliva z ulikam rekłamy) fizična niemahčyma.Pryčym ličby ich manitorynhu vielmi blizkija da patrebnych, tam zamiest 4% moža fihuravać 3,83%. Ale znajści parušeńni pry žadańni taksama vielmi prosta.
Nahadajem, što na samym pačatku siońniašniaha pasiedžańnia žurnalistam było zajaŭlena, što razhlad spravy budzie zakrytym, bo akurat siońnia ŭ sudzie pavinny byli razhladać materyjały kanfidencyjnaha charaktaru.
12 studzienia 2011 hoda «Aŭtaradyjo» atrymała pradpisańnie RUP «BiełDIE» Minsuviazi RB pra spynieńnie dziejańnia dazvołu na prava vykarystańnia radyjočastotnaha śpiektru i zabaronie na ekspłuatacyju radyjoelektronnych srodkaŭ. Pradpisańnie vynieśli na padstavie rašeńnie Respublikanskaj kamisii pa telebačańni i radyjoviaščańni 188/11 ad 11 studzienia 2011 h. za podpisam staršyni kamisii ministra infarmacyi Aleha Pralaskoŭskaha. Kamisija paličyła, što ŭ efiry «Aŭtaradyjo» raspaŭsiudžvałasia infarmacyja, u jakoj źmiaščalisia publičnyja zakliki da ekstremisckaj dziejnaści.
Nastupny praces pa spravie aŭtaradyjo adbudziecca 24 lutaha.
