Ad 5 da 1 000 dalaraŭ 9

Hadzińnik palityka: imidžavy aksesuar ci niepatrebnaja raskoša? Ci źjaŭlajecca taki važny dla dziełavoha čałavieka aksesuar, jak hadzińnik, elementam imidžu biełaruskaha palityka?

Va ŭsim śviecie naručny hadzińnik — važny i nieabchodny składnik imidžu paśpiachovaha čałavieka, jaki žadaje z dapamohaj hetaha aksesuara padkreślić svoj status i stanovišča ŭ hramadztvie albo pakazać svaju indyvidualnaść.

Ź lideraŭ zamiežnych krainaŭ samyja darahija hadzińniki nosić prem'jer-ministar Italii Silvijo Berluskoni. U jaho jość madeli, košt jakich dachodzić da 500 tysiač eŭra. A voś u Baraka Abamy hadzińnik adnosna tanny: Jorg Gray 6500 kitajskaj vytvorčaści, jaki kaštuje kala 200 dalaraŭ. Miž tym na pačatku pieradvybarčaj kampanii Abama nasiŭ švajcarski Tag Heuer koštam 1500 dalaraŭ, adnak daradcy padkazali jamu, što hety hadzińnik vyhladaje zanadta doraha, i dziela pośpiechu jon pavinien nasić štości takoje, što moža dazvolić sabie šarahovy amerykaniec — Abama prysłuchaŭsia.

Na pytańnie, jakoj marki ŭ jaho hadzińnik, Ryhor Kastusioŭ adrazu adkazać nia zdoleŭ:

— 

Hadzińnik? Voj, pačakajcie, treba pahladzieć, jon u mianie na ruce…

Heta stary padarunak, jašče ŭ 2000-m hodzie padaryli jaho maje siabry. Pa-mojmu, biełaruskaj vytvorčaści. Na cyferblacie niama firmy. Tut napisana pradpryjemstva, jakoje mnie jaho padaryła, viciebskija siabry-budaŭniki, maje kalehi pa pracy. Jany nanieśli emblemu svajoj firmy i, mahčyma, zamalavali firmu, jakaja hadzińnik zrabiła.

Karespandentka: «Ci pavinny być u palityka niejkija imidžavyja darahija rečy, treba heta ci nie?»

— Mnie ciažka mierkavać, ale kali palityk moža sabie dazvolić darahuju reč, kali jon bahaty, jak Alaksandar Ryhoravič, to jon, kaniečnie, moža dazvolić hadzińnik i za niekalki tysiač dalaraŭ. U mianie takich hrošaj niama, tamu ja našu toje, što mahu dazvolić sabie kupić — kaścium biełaruskaj vytvorčaści, pantofli i ŭsio astatniaje.

Kandydat u prezydenty Alaksiej Michalevič adrazu ž nazvaŭ marku i košt svajho hadzińnika:

— «Certina» — pa-italjansku heta tak čytajecca. Jak heta na inšych movach, nia viedaju. Hadzińnik švajcarski.

Karespandentka: «A kolki kaštuje?»

— Dalaraŭ 400–500.

Karespandentka: «Ci pavinny być u palityka niejkija imidžavyja rečy?»

— Heta jon sam vyrašaje.

Kali jon pracuje z rabočymi, adlustroŭvaje intaresy rabočych, dumaju, jamu nie pažadana nasić takija hadzińniki.

Karespandentka: «Vy ž viedajecie, što ŭ kiraŭnika dziaržavy pa 17 tysiač dalaraŭ hadzińniki».

— Nu, kali čałaviek pracuje ź inšymi kiraŭnikami dziaržavy, ja da hetaha staŭlusia spakojna. Kali heta słužbovy hadzińnik, skažam tak, to heta narmalna.

Darečy, u Alaksandra Łukašenki zaŭvažanyja ažno dva švajcarskija hadzińniki Patek Philippe, jakija kaštujuć prykładna pa 17 tysiač dalaraŭ.

Kandydat u prezydenty Ŭładzimier Niaklajeŭ, jak i Ryhor Kastusioŭ, firmu hadzińnika adrazu nie nazvaŭ:

— Voj, heta treba hlanuć. Voj, praŭda, nia viedaju… Žonka padaryła.

Bliščyć tak, što nie razhladzieć. Łon… Łon… Tut kažuć, što niakiepskija…

Karespandentka «Longines», mabyć, ja vam padkažu. Švajcarski.

— Tak, tak.

Karespandentka: «Vaša mierkavańnie nakont imidžavych rečaŭ. Ci pavinny jany być u palityka?»

— Nu voś hety hadzińnik darahi mnie tolki tym, što Volha padaryła. Nu, a skazać, što jon imidžavy…. Ja tolki zaraz źviarnuŭ uvahu, jakaja tut nasamreč firma. Nu, dobraja, nia samaja krutaja, jak jana mnie kazała, ale kab ja vyhladaŭ nia biednym čałaviekam. Imidž u artysta moža być — jon moža zakrucić sabie niešta na hałavie, šalik na šyi. U paeta — ja zaŭsiody chadziŭ u takich volnych «prykidach». A imidž palityka — heta ŭsio ž taki jahonaja pazycyja. Ci heta imidž palityka, jaki zaŭsiody trymaje svajo słova. Ci heta imidž palityka, jaki jaho skazaŭ i zabyŭsia. Ci heta imidž palityka, jaki palitykaj zajmajecca nasamreč dziela dasiahnieńnia niejkich ahulnych intaresaŭ, ci dziela sabie samoha.

Imidž palityka ŭsio ž taki — u jahonaj palitycy, u dziejańniach jahonych, u rašeńniach pryniatych, a nia ŭ tym, što jon nosić na ruce, nazirajučy za časam.

Jarasłaŭ Ramančuk pryznaŭsia, što lubić salidnyja hadzińniki:

— Takaja francuskaja kampanija «TAG Heuer».

Karespandentka: «A kolki jon kaštuje?»

— 1 tysiaču dalaraŭ kaštuje.

Karespandentka: «A jak vy ličycie, u surjoznych palitykaŭ pavinny być niejkija imidžavyja rečy?»

— Ja dumaju, što ŭ kožnaha palityka pierš za ŭsio pavinna być hałava.

Heta asnoŭnaje. Heta najvažniejšaja imidžavaja reč. A ŭsio astatniaje — heta taki anturaž, dekaracyi da hetaha asnoŭnaha elementu.

U Vitala Rymašeŭskaha taksama švajcarski hadzińnik:

— Firma Swiss Military Hanowa, ci jak… Švajcarski hadzińnik. Nia pamiataju, pa-mojmu, jon 100 dalaraŭ kaštuje. Albo 100 eŭra. Nabyŭ u Bernie, stalicy Švajcaryi, vybiraŭ jaho sam.

Karespandentka: «Jak vy ličycie, ci pavinny być u surjoznaha palityka, kandydata ŭ prezydenty, u prezydenta niejkija imidžavyja rečy?»

— U našaj krainie hałoŭnyja imidžavyja rečy dla kandydata ŭ prezydenty — heta śmiełaść i sumlennaść. Ja žadaju, kab u kožnaha kandydata biełaruskaha jany byli ŭ našych umovach. Usio astatniaje — heta ŭžo «panty», niepatrebnaje ŭ našych umovach.

Andrej Sańnikaŭ ceły dzień znachodziŭsia albo ŭ darozie, albo sustrakaŭsia z vybarcami. Da jaho datelefanavacca nie ŭdałosia. Jahonaja žonka Iryna Chalip raspaviała:

— Mahu tolki skazać, što nosić jon švajcarski hadzińnik «Longines». Kolki kaštuje, nie mahu skazać, tamu što kuplaŭ jon hadzińnik, kali jašče pracavaŭ u Ženevie.

Mikoła Statkievič da firmovych i imidžavych rečaŭ stavicca spakojna. Što da marki hadzińnika, jon kaža:

— Nia viedaju dakładna. Padaryli niejki, jon kvarcavy, zvyčajny taki, moža, krychu daražej, čym 5 dalaraŭ.

Bo raniej ja nasiŭ za 5 dalaraŭ, na Varšaŭskim vakzale kupleny. Hety vyhladaje bolš stroha, ale pryblizna toje samaje.

Tolki krychu daražej. Jak jon tam zaviecca, nia viedaju, ale firma nieviadomaja. Aby jšoŭ…

Karespandentka: «A jak vy naahuł staviciesia da takich byccam by imidžavych rečaŭ: hadzińnika, zapanak, źniešniaha vyhladu, firmovych rečaŭ?»

— Ja ŭvohule spakojna staŭlusia da imidžavych rečaŭ, vielmi spakojna. Viedajecie, kali dva hady pabudzieš u miescach nia vielmi dalokich — i tak u mianie staŭleńnie było vielmi spakojnaje, a kali tam pabudzieš, psychalohija mianiajecca: inšyja kaštoŭnaści stanoviacca hałoŭnymi. Na hetym ja nie «zamaročvajusia».

Kandydat u prezydenty Viktar Ciareščanka pryznaŭsia:

— U mianie hadzińnik japonski, kupleny ŭ 1990-m hodzie ŭ ZŠA, kali ja byŭ słuchačom prahramy MVA va ŭniversytecie štatu Dełaver.

Karespandentka: «A jakoj firmy i kolki kaštavaŭ?»

— Jon kaštavaŭ 49 dalaraŭ tady, heta ŭzrovień nižejšy za siaredni. Ale ja jaho našu i siońnia, jon vielmi zručny, i dyzajn vielmi pryhožy.

— Dziejny kiraŭnik nosić dva hadzińniki niatannyja…

— Nu, ja našu zvyčajnyja rečy, jakija kožny nosić, navat student. Kazali, što ŭ mianie aŭto samaje krutoje. Nu jakoje krutoje? Dva hady aŭtamabilu, kaštavaŭ 17 tysiač dalaraŭ. «Dodž-karavan», mini-ven, nu jaki jon kruty? Zvyčajny aŭtamabil.

Kandydata ŭ prezydenty Dźmitryja Usa pytańnie pra marku hadzińnika spačatku naahuł aburyła. Ale na pytańnie adkazaŭ:

— «Citizen» albo jak? «Citizen». Zborka nia viedaju čyja.

Karespandentka: «A jak vy ličycie, ci pavinny być niejkija imidžavyja rečy ŭ palityka?»

— O-o-o. Inšych pytańniaŭ zadać vy nia možacie?

Specyjalist u sfery reklamy Julija Laškievič na pytańnie, ci źjaŭlajecca hadzińnik pakazčykam statusu, važnym imidžavym aksesuaram dla biełaruskich kandydataŭ u prezydenty, adkazała tak:

— Nie, ja dumaju, što nie. Heta majo asabistaje mierkavańnie.

Apošniaje, pra što dumali vybarcy, kali hladzieli debaty, heta jakija hadzińniki ŭ našych kandydataŭ. Niama ŭ nas, napeŭna, jašče takoj kultury va ŭsprymańni.

I ničoha strašnaha ŭ hetym, ja miarkuju, niama. Ad taho, jaki ŭ kandydata hadzińnik, usprymańnie jaho ŭ vačach ludziej nie pamianiajecca.

Ina Studzinskaja, Radyjo Svaboda

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH