Kandydat ad AHP znoŭ byŭ z banieram «Miljon novych rabočych miescaŭ». Pałasaty pinžak pamianiaŭ na strohi čorny. Pramaŭlaŭ vielmi chutka.
Adrazu skazaŭ, što kandydat u prezidenty musić mieć kankretny płan i prahramu. Voś u Juščanki i Cimašenki jaje nie było, ale my nie pojdziem pa ich šlachu.
«Biełarusi patrebny paradak, stabilnaść i zakonnaść», — Ramančuk pierakonvaŭ, što jahonuju prahramu adobryli najlepšyja ekanamisty śvietu.
Prademanstravaŭ dva ajfony. Adzin — amierykanski, druhi — kitajski. Pieršy pracuje dobra, a druhi — nie.
U palityčnym płanie prapanoŭvaje, što prezident moža być tolki dva termina na pasadzie pa čatyry hady. Prapanuje sistemu miascovaha samakiravańnia. Prapanoŭvaje, kab 70% tracili miascovyja ŭłady.
U źniešniaj palitycy prapanuje pryncyp adkrytaj krainy. «Ja chaču, kab Biełaruś była krainaj jeŭrapiejskich standartaŭ. Čamu? Bo ŭ Jeŭropie ludzi lepš žyvuć», — kaža Ja.Ramančuk.
«Nam treba zdymać vizavyja barjery. Kab realizoŭvać prajekty pa enierhaniezaležnaści nam treba supracoŭničać ź Jeŭropaj, ale nie na škodu Rasii. Kiepskaja tendencyja, kali my spračajemsia ź vialikaj krainaj Rasijaj».
«Dla tych, chto imkniecca da samaizalacyi, prydumali novy znak zadyjaka — łoch», — raskazaŭ Jarasłaŭ.
U centry jahonaj ekanamičnaj prahramy lažyć dakumient «Miljon novych rabočych miescach». «Kali pradprymalnikaŭ pierastanuć cisnuć, to stvarać hetyja miescy budzie značna praściej», — kaža Ramančuk.
Abiacaje, što biurakratyi budzie značna mieniej. «Čamu žyllo takoje darahoje? Bo jość padatki. A pasprabujcie vybić ziamlu — heta taki hałaŭny bol, takija chabary. U nas žyllo budzie ŭ dva razy tańniejšym, čym ciapier», — prapanoŭvaje kandydat.
Zaznaje redki nieprafiesijanalizm u sielskaj haspadarcy. Kaža, što ŭ nas vielmi mnoha ladovych pałacaŭ. Zamiest ich prapanuje budavać sučasnyja miedyčnyja centry.
Prapanuje budaŭnictva tannych internataŭ. «Kali my heta rabić nie budziem, to moładź prosta źjedzie z krainy».
Jašče budavacca buduć biaspłatnyja hulniavyja placoŭki. «Ja nie suprać jeŭramontaŭ u śvinarnikach, ale ja ludziej lublu bolš, čym śviniej», — kaža, što jeŭraramonty patrebnyja kvateram.
Stavić pad sumnieŭ, što ŭ Biełarusi isnuje biaspłatnaja adukacyja i miedycyna. «Nastaŭniki zavalenyja biurakratyčnaj pracaj. Treba pracavać nie na adnu staŭku, kab atrymlivać hodny zarobak».
Paraŭnoŭvaŭ zamiežny i ajčynny insulin. «Treba padtrymlivać ajčynnaha vytvorcu, ale nie za košt zdaroŭja ludziej».
Uspomniŭ pra Irynu Kazulinu. Pra mučeńni žančyn, što prachodziać praz chvarobu raka hrudziej. Pakazaŭ dakład Ludmiły Piecinaj pra dyskryminacyju žančyn u Biełarusi. Havaryŭ pra «mužčynski šavinizm». «Hetaj dyskryminacyi treba kłaści kaniec», — zaznačyŭ kandydat.
Abiacaje dapamohu pa biespracoŭi 120 dalaraŭ. Stavić pytańnie paŭnavartasnaha strachavoha instytuta ŭ Biełarusi.
«Čamu ja budu lepšym prezidentam, čym Łukašenka? Bo ŭ majoj kamandzie buduć razumnyja ludzi. Ludzi nie bojciesia dumać — heta nie baluča».
Naprykancy pramovy zaklikaŭ ludziej na Płošču 19 śniežnia. Zaklikaŭ uziać z saboj buterbrody i pryvieści lubimuju ciošču.
