Partał Wikileaks, jaki na minułych vychodnych pačaŭ vykładać u ahulny dostup na internecie depešy amierykanskich dypłamataŭ, na hety momant vystaviŭ užo bolš za 600 materyjałaŭ, z kožnaj hadzinaj hetaja ličba raście.
Paviedamleńniaŭ z ambasady ZŠA ŭ Minsku, jakich, pavodle apisańnia źmiestu bazy dadzienych, naličvajecca bolš za tysiaču, na partale pakul jašče niama. Adnak Biełaruś zhadvajecca ŭ dziasiatkach paviedamleńniaŭ ź inšych miescaŭ.
Siarod inšaha pra Biełaruś havaryŭ prakuror Nacyjanalnaha suda Ispanii Chase Hrynda Hansales, vystupajučy 14 studzienia 2010 hoda sa spravazdačaj ab zachadach Ispanii ŭ baraćbie z arhanizavanaj złačynnaściu.
Havoračy pra rasijskuju mafiju, Hrynda zaznačaje, što było b niedakładna nazyvać jaje «rasijskaj», bo ŭ joj biaruć udzieł i ŭkraincy, hruziny, biełarusy i čačency.
«Hrynda zajaviŭ, što ličyć Biełaruś, Čačniu i Rasiju faktyčna „mafijnymi dziaržavami“ i nieŭzabavie takoj stanie i Ukraina. U kožnaj z hetych krainaŭ, jak jon śćviardžaje, niemahčyma pabačyć roźnicu pamiž dziejnaściu ŭradaŭ i hrupaŭ arhanizavanaj złačynnaści», havorycca ŭ depešy, pasłanaj ambasadaj ZŠA ŭ Madrydzie.
