Anton Astapovič: Viedamstva Łatuški razhladaje pytańnie viartańnia budynku byłoha kleckaha kaścioła aŭtentyčnaha vyhladu.
Tak vyhladaje carkva ŭ Navahrudku paśla ŭstalavańnia kupałaŭ. Fota svaboda.org
Pavodle prajektu Hienadzia Łaŭreckaha budynak carkvy Barysa i Hleba budzie sumiaščać elemienty hotyki i pazałočanyja kupały.
«Cybuliny» z byłoha kleckaha kaściołu mohuć źniknuć.
U paniadziełak 15 listapada ŭ Navahrudak pryjazdžaŭ pradstaŭnik upraŭleńnia kultury Hrodzienskaha abłvykankamu, kab na miescy vyrašyć pytańnie ŭstalavańnia na carkvie Barysa i Hleba novych kupałaŭ. Pracy byli praviedzienyja na minułym tydni. Aŭtar prajektu rekanstrukcyi carkvy — Hienadź Łaŭrecki, dacent BNTU, staršynia architekturna-mastackaj rady Biełaruskaha ekzarchatu. Zhodna jaho prajektu, na ścienach carkvy płanujecca ahalić kładku XVI st., a taksama, pa mahčymaści, halereju i ścieny ŭ styli hotyki XII st.
Dazvoł na pracy, nasupierak zapeŭnivańniam čynoŭnikaŭ Navahrudskaha rajvykankama, atrymany nie byŭ. Bolš za toje, pa słovach načalnika Upraŭleńnia pa achovie historyka-kulturnaj spadčyny i restaŭracyi Ministerstva kultury Ihara Čarniaŭskaha, adpaviednyja dakumienty jašče tolki rychtujucca. Pradstaŭnik abłvykankamu i adździeł kultury Navahrudskaha rajvykankamu padrychtavali na adras prychoda carkvy Barysa i Hleba pradpisańnie. Pavodle jaho,
nastajaciel carkvy a.Mikałaj Orsa pavinien budzie padparadkavacca rašeńniu navukova-mietadyčnaja Rady, jakoje pakul rychtujecca, i ŭnieści zhodna jaho źmieny va ŭstalavanyja kupały.
Staršynia Tavarystva achovy pomnikaŭ Anton Astapovič kamientuje raźvićcio padziej vakoł navahrudskaj carkvy z aściarožnym aptymizmam. Pa jaho słovach, raniej padobnyja incydenty vakoł abjektaŭ historyka-kulturnaj spadčyny raźvivalisia pa padobnym scenary pa ŭsioj Biełarusi. Budynki carkvaŭ, ci byłych kaściołaŭ ź inicyjatyvy śviataroŭ i z maŭklivaj zhody miascovych uładaŭ biez dazvołu Ministerstva kultury pierarablaŭsia na svoj kapył. Ministerstva ž umiešvałasia ŭ spravu post-faktum, kali čaściej za ŭsio ŭžo było pozna štości źmianiać. Tak było ŭ Klecku, Hoščavie Ivacevickaha rajonu, u Navahrudku. «Składvajecca ŭražańnie, što ad ministerstva mała što zaležyć. Jano faktyčna ničoha nie moža zrabić z parušalnikami zakanadaŭstva», — kaža A. Astapovič. Ale, pa jaho nazirańniach, situacyja źmianiajecca: «Minkultury pačało vyjaŭlać imknieńnie razabracca ŭ situacyi. Na praciahu apošnich miesiacaŭ prasočvajecca peŭnaja sistema dziejańniaŭ u dačynieńni da abjektaŭ historyka-kulturnaj spadčyny». Staršynia tavarystva pryvodzić prykład: u časie apošniaha vizitu ŭ ministerstva jon daviedaŭsia, što viedamstvam rychtujecca rašeńnie pa byłym daminikanskim kaściole ŭ Klecku. Na im, biez dazvołu Minkultu i z parušeńniem zakanadaŭstva byli ŭstalavanyja cybulepadobnyja kupały.
Pavodle Astapoviča, ciapier razhladajecca pytańnie viartańnia budynku byłoha kleckaha kaścioła aŭtentyčnaha vyhladu.
Z aściarožnym aptymizmam spadar Astapovič havoryć i pra navahrudskuju historyju: «Prykład Klecka pakazvaje, što ŭ navahrudskaj carkvy nie samyja horšyja pierśpiektyvy».
