Miedyki niezadavolenyja chvorymi z apiendycytam: apošnija źviartajucca pa dapamohu na poźnich stadyjach chvaroby, jakaja pahražaje ciažkimi ŭskładnieńniami. A da toj pary prosta cierpiać bol, zajadajučy jaho tabletkami i prahravajučy žyvot hrełkaj. Kali tolki vy nie vorah samomu sabie, ni ŭ jakim vypadku hetaha rabić nielha! — papiaredžvajuć daktary.
Kali balić žyvot — ni ŭ jakim razie nielha kłaści hrełku na žyvot. Nie treba taksama rabić klizmy i inšyja pracedury ŭ chatnich umovach. Mnohija pamylajucca, kali pačynajuć prymać aktyvavany vuhal i bolesucišalnaje, a časam navat śpirtnyja napoi. Hetym jany ścirajuć prykmiety apiendycytu, ale zapalenčy praces usio roŭna praciahvajecca. Tak uźnikajuć roznyja ŭskładnieńni.
Siemački ni pry čym
Apiendyks — heta achoŭny orhan, jaki ŭvachodzić u imunnuju sistemu. Jaho asnoŭnaja zadača zaklučajecca ŭ tym, kab abaraniać kišečnik ad bakteryj. Zatrymlivajučysia ŭ im, jany taksama mohuć spravakavać zapaleńnie.
Prafiłaktyki apiendycytu nie isnuje, tamu što niama nivodnaj dakładna vyznačanaj pryčyny. I toje, što vinavatyja siemački i vinahradnyja kostački, — heta prosta narodnaja vydumka. Da raźvićcia apiendycytu viadzie sukupnaść faktaraŭ — takich, naprykład, jak nieracyjanalnaje charčavańnie, infiekcyi, parušeńni krovazabieśpiačeńnia červiepadobnaha adrostka, zapalenčyja zachvorvańni kišečnika, zaražeńnie hlistami. Adzinaje, što možna zrabić, kab źmienšyć ryzyku, — pravilna charčavacca: nie jeści ŭsuchamiatku, nie złoŭžyvać vostrym, salonym, vendžanym. Charčavacca treba minimum 3–4 razy ŭ sutki, pry hetym u racyjonie abaviazkova pavinna być vadkaja i ciopłaja ježa.
Balić pad łyžačkaj — heta pačatak
Apiendycyt raźvivajecca pastupova: u pieršyja hadziny chvaroby adrostak aciakaje, zatym nahnojvajecca. Hałoŭny simptom zapaleńnia — bol u žyvacie. Spačatku jon niepakoić pad łyžačkaj, u vierchnich adździełach žyvata, bolevyja impulsy pieradajucca na soniečnaje splacieńnie i straŭnik. Praz paru hadzin boli pieramiaščajucca ŭ nižnija pravyja adździeły žyvata. Pry apiendycycie myšcy žyvata napružanyja, i luby dotyk uzmacniaje bolevyja adčuvańni. U chvoraha źjaŭlajucca młosnaść i vanity, moža pavyšacca tempieratura. Heta kłasičnyja simptomy apiendycytu pry narmalnym raźmiaščeńni adrostka.
U vypadkach, kali apiendyks raźmieščany anamalna, naprykład, u vobłaści nyrki, pry jaho zapaleńni balić pajaśnica, čałavieka niepakoić častaje močaspuskańnie. Kali adrostak znachodzicca ŭ vobłaści taza, to boli źjaŭlajucca nad łonam i ŭ vobłaści mačavoha puzyra.
Byvaje i tak, što čałaviek pieranosić simptomy apiendycytu, boli sami prachodziać, a praź niekatory čas znoŭ viartajucca. Tak pačynajecca chraničny apiendycyt. Apošni dastaŭlaje chvoramu mnostva niazručnaściaŭ: kožny prystup apiendycytu pahražaje raźvićciom pierytanitu (zapaleńniem brušyny), i pry kožnym prystupie treba źviartacca da doktara. Chraničny apiendycyt nie patrabuje vydaleńnia adrostka, adnak, kali prystupy paŭtarajucca časta, adrostak lepš vydalić.
Niebiaśpiečna!
Kali svoječasova nie źviarnucca da chirurha, adbyvajecca razryŭ adrostka, hnoj vylivajecca ŭ brušnuju połaść i raźvivajecca pierytanit. Isnujuć i inšyja ciažkija ŭskładnieńni vostraha apiendycytu, uklučajučy zaražeńnie kryvi (siepsis).
Asablivaj uvahi patrabujuć dzieci i pažyłyja ludzi. Małyja časta nie mohuć dakładna skazać, dzie i jak balić. Płaksivaść, małaruchomaść dziciaci, admova ad ježy ŭ spałučeńni z bolami ŭ žyvacie mohuć havaryć pra apiendycyt. U pažyłych ludziej bolevyja adčuvańni mohuć być zhładžanymi, što pryvodzić da poźniaj dyjahnostyki chvaroby.
Lečać apiendycyt tolki chirurhična — šlacham vydaleńnia červiepadobnaha adrostka. Apieracyju vykonvajuć pad ahulnym abo miascovym narkozam.
Isnujuć dźvie mietodyki vydaleńnia apiendyksa. Pry tradycyjnaj žyvot razrazajuć sprava i vydalajuć zapalony červiepadobny adrostak. U niekatorych klinikach prymianiajecca łaparaskapičny mietad, jaki maje šerah pieravah. Jon dazvalaje maksimalna dakładna ŭstanavić dyjahnaz i ažyćciavić dostup da apiendyksa pry lubym jaho raźmiaščeńni, zabiaśpiečvaje mienšuju stratu kryvi i źnižeńnie ryzyki paślaapieracyjnych uskładnieńniaŭ. Dziakujučy hetaj mietodycy źnižajecca kolkaść niepatrebnych vydaleńniaŭ apiendyksa. Što važna, pakolki heta achoŭny orhan i jon patrebien arhanizmu hetaksama, jak i ŭsie astatnija.
Parady doktara Kožny čałaviek viedaje svoj arhanizm. Kali boli novyja, nieviadomyja, treba abaviazkova iści da doktara. Pry źjaŭleńni simptomaŭ apiendycytu nieabchodna terminova źviarnucca ŭ dzionny čas u palikliniku, a viečaram abo nočču — vyklikać «chutkuju dapamohu»! Da ahladu doktara nie varta prymać bolesucišalnyja srodki i inšyja leki, pakolki heta ŭskładnić pastanoŭku dyjahnazu. Taksama nielha jeści i pić. Ni ŭ jakim razie nie prykładvajcie da žyvata hrełku! Ciapło paskaraje zapalenčy praces i moža pryvieści da bolš rańniaha raźvićcia ŭskładnieńniaŭ vostraha apiendycytu. Na žyvot možna pakłaści choład.
Vyklikać doktara nieabchodna navat u tym vypadku, kali mocnyja boli ścichli, pakolki heta niaredka śviedčyć pra pierachod chvaroby ŭ samuju ciažkuju stadyju.
