Stareńnie zaležyć tolki ad hienaŭ i ładu žyćcia, akiśleńnie ni pry čym

Padčas daśledavańnia peŭnych učastkaŭ chramasomaŭ-ciełamieraŭ navukoŭcy z brytanskaha ŭniversytetu ŭ Lestery i londanskaha Kings College pryjšli da vysnovy adnosna hienetyčnaj zaprahramavanaści chutkaści bijalahičnaha stareńnia arhanizmu.

Takoje zaklučeńnie zroblenaje na padstavie hałoŭnaj asablivaści ciełamieraŭ — karacicca pry kožnym cykle dzialeńnia kletak. Mienavita chutkaść hetaha pracesu i moža być adnym z asnoŭnych faktaraŭ stareńnia arhanizmu, śviedčać brytanskija hienetyki.

Pavodle prafesara Cima Spektara z Kings College, «ludzi z adpaviednaj hienetyčnaj schilnaściu mohuć stareć jašče chutčej, kali ich ciełamiery, hetak mović, trapiać u niespryjalnaje asiarodździe. Razmova idzie pra peŭnyja škodnyja zvyčki čałavieka — kureńnie, małaruchomaść, atłuścieńnie». U takim vypadku vynikam budzie albo bolš chutkaje stareńnie arhanizmu, albo jaho schilnaść da zaŭčasnych uzrostavych zachvorvańniaŭ, u tym liku, chvarobaŭ Alchajmera, Parkinsona ci sardečna-sasudzistych dy endakrynnych patalohijaŭ. Niespryjalnymi ŭmovami dla ciełamieraŭ taksama źjaŭlajucca stały psychičny i emacyjny stres, jaki pryvodzić da neŭrozu, syndromu chraničnaj stomlenaści, a taksama chraničnaje niedajadańnie, apramieńvańnie, niekatoryja inšyja faktary. U vyniku bijalahičnaja forma čałavieka źmianiajecca strukturna. Inšymi słovami arhanizm jak systema rassypajecca.

Jak ličać brytanskija navukoŭcy, dla vyvučeńnia pryčynna-vynikovaj suviazi pamiž ciełamierami, pracesam stareńnia i vyznačeńniem šerahu chvarobaŭ nieabchodnyja dadatkovyja daśledavańni. Tym bolš, što, u lubym vypadku, jany važnyja ź hledzišča razumieńnia pracy kletak arhanizmu, tłumačeńnia šerahu źjavaŭ, a taksama abviaržeńnia roznych mitaŭ adnosna cudadziejnaści amaładžalnych dyjetaŭ dy kremaŭ.

Akiślalny stres nie adyhryvaje nijakaj roli ŭ pracesie stareńnia.

Viera ŭ cud viartańnia maładości pry dapamozie roznych kremaŭ, vitaminaŭ, BADaŭ, dyjetaŭ avałodała hałovami miljonaŭ spažyŭcoŭ. Hruntujecca jana na raspaŭsiudžanaj siarod farmakolahaŭ dy dyjetolahaŭ teoryi nazapašvańnia ŭ arhaniźmie paškodžanych superaksidami malekułaŭ. Padobny praces nazyvajecca akiślalnym stresam. I mienavita roznaha kštałtu antyakiślalniki pamianšajuć uździejańnie superaksidaŭ na arhanizm čałavieka.

Pavodle ekspertaŭ Kings College, šmatlikija daśledavańni, nakiravanyja na dokaz hetaj teoryi, byli niepierakanaŭčymi, i akiślalny stres nasamreč nie adyhryvaje anijakaj roli ŭ pracesie stareńnia.

Jak vynikaje z artykułu ŭ časopisie Genes and Development,

daśledavańni adnosna efektu amaładžalnych srodkaŭ byli praviedzienyja na čarviakach-niematodach, u arhanizmach jakich majecca šmat tych ža hienaŭ, što i ŭ čałavieka.

Hienetyčnym šlacham daśledčyki damahlisia taho, što arhanizmy niematodaŭ atrymali mahčymaść vyzvalicca ad lišku superaksidaŭ.

Pavodle navukovaha kiraŭnika daślednickaj hrupy doktara Devid Džema,

kali teoryja «amaładžeńnia» dakładnaja, heta pryviało b da taho, što praciahłaść žyćcia hetych čarviakoŭ była b daŭžejšaj u paraŭnańni ź ichnymi «nieamałodžanymi» suplamieńnikami. Adnak, hetaha nie adbyłosia,

piša Genes and Development.

Pavodle radyjo «Svaboda»

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH