Pytańni taksama vyklikała rehistracyja Łukašenki, Hajdukieviča i Niaklajeva.
Photo.bymedia.net
27 vieraśnia Centrvybarkam razhladaŭ zajavy kandydataŭ u prezidenty pa rehistracyi ich inicyjatyŭnych hrupaŭ. Ahułam viedamstva Jarmošynaj atrymała 19 zajavaŭ.
Absalutnaja bolšaść niesła dakumienty ŭ apošnija dni. Papiarednie była zarehistravanaja inicyjatyŭnaja hrupa tolki ekanamista Viktara Ciareščanki.
Ad pačatku było zrazumieła, što dvoje kandydataŭ nieabchodnyja normy nie vykanali. Biespracoŭny Dabratvor padaŭ inicyjatyŭnuju hrupu z adnaho siabie, pry minimumie ŭ sto čałaviek. Pry hetym chłopiec jašče i maładziejšy za «prezidencki ŭzrost».
Druhoj niezarehistravanaj stała sanitarka Starykava. U jaje hrupu ŭvajšło tolki 30 čałaviek. Tak prezidenckaja kampanija pazbaviłasia adzinaj žančyny.
Što da astatnich kandydataŭ, to pytańni ŭźnikli pa troch — Alaksandru Łukašenku, Siarhieju Hajdukieviču i Uładzimiru Niaklajevu.
Viciebski pradprymalnik Uładzimir Pravalski padaŭ u CVK zajavu, u jakoj prasiŭ nie rehistravać hrupy Łukašenki, bo toj asabista nie padavaŭ svaich dakumientaŭ.
Jarmošyna patłumačyła, što dakumienty moža pieradavać i davieranaja asoba, to bok Alaksandr Radźkoŭ.
U prykład jana pryviała prezidenckija vybary 2006‑ha hodu. Tady kandydat Siarhiejem Skrabcom nie moh piersanalna pieradać dakumienty, bo znachodziŭsia ŭ śledčym izalatary. Takim čynam kiraŭnica Centrvybarkamu paraŭnała Łukašenku sa źniavolenym.
Pravalski, u svaju čarhu, zajaviŭ, što ŭ adnu z vybarčych kampanijaŭ jaho nie zarehistravali kandydatam u deputaty, bo jon nie prysutničaŭ pa pasiedžańni vybarčaj kamisii, kali taja razhladała jahonyja dakumienty.
«Vychodzić, dla adnych zakon jość, a dla druhich — niama», — padsumavaŭ Pravalski.
Hetyja słovy prysutnyja ŭ zale sustreli apładysmientami.
Što da Hajdukieviča, to ŭ jahonym vializnym śpisie vyjavilisia «miortvyja dušy». Svajo proźvišča tam znajšoŭ navat adzin ź siabroŭ CVK, jaki pra toje ni snom ni ducham.
Jašče ŭ Hajdukieviča znajšli ŭ śpisach 30 arabskich proźviščaŭ. Dvoje siabroŭ CVK byli suprać rehistracyi kandydata, ale absalutnaja bolšaść vykazałasia «za».
«Što za vybary biez Hajdukieviča?» — absiok svaich kaleh sakratar CVK Mikałaj Łazavik.
Što datyčyć Niaklajeva, to tut kamisiju cikavili hady praviedzienyja paetam za miažoj. Što heta? Tvorčaja kamandziroŭka, ci emihracyja? Syšlisia na pieršym varyjancie.
Łazavik taksama mielkam uzhadaŭ zajavu «Zialonych», jakija prasili nie rehistravać Niaklajeva, bo toj zabiŭ kotku.
Takim čynam, na etap zboru podpisaŭ vychodziać 17 kandydataŭ. Podpisy pačnuć źbirać užo na hetym tydni.
