Lider arhkamiteta pa stvareńni Biełaruskajsacyjał-demakratyčnaj partyi (Narodnaja Hramada) Mikoła Statkievič zajaviŭ ab «vysokaj vierahodnaści» svajho vyłučeńnia kandydatam na pasadu prezidenta.
«Kančatkovaje rašeńnie budzie pryniata 18 vieraśnia na pasiadžeńni biuro partyi z udziełam rehijanalnych lideraŭ. Adnak mahu skazać, što tolki adzin ź ich vykazvaje sumnieŭ nakont nieabchodnaści ŭdziełu ŭ prezidenckich vybarach kandydata ad Narodnaj Hramady», — skazaŭ Statkievič.
Palityk padkreśliŭ, što źjaŭlajecca prychilnikam udziełu ŭ prezidenckich vybarach adzinaha kandydata ad demakratyčnych siłaŭ i budzie praciahvać pravodzić adpaviednyja kansultacyi dalej. «Na žal, sproby vyznačyć adzinaha kandydata ni da čaho nie pryviali. Spadziajusia, apazicyjnyja lidery stanuć bolš zhavorlivymi, kali sutyknucca ź ciažkaściami pry zbory podpisaŭ», — skazaŭ jon.
Pry hetym Statkievič adznačyŭ, što Narodnaj Hramadzie pa siłach sabrać nieabchodnyja dla rehistracyi kandydata na pasadu prezidenta 100 tysiač podpisaŭ.
Statkievič taksama ličyć, što vyniki prezidenckich vybaraŭ hetaha hoda mohuć być pryznanyja niedemakratyčnymi i niesvabodnymi nie tolki Jeŭrasajujuzam, ale i Rasijaj. «U takoj situacyi adziny kandydat, jaki zajaviŭ ab falsifikacyjach vynikaŭ vybaraŭ i svajoj realnaj padtrymcy nasielnictvam, moh by nazyvać siabie abranym prezidentam. Pry ŭdziele ŭ vybarach niekalkich demakratyčnych kandydataŭ takaja situacyja naŭrad ci mahčymaja», — skazaŭ jon.
Takim čynam razam z M.Statkievičam pra svoj udzieł u prezidenckaj kampanii zajavili jašče vosiem čałaviek:
staršynia ŁDP Siarhiej Hajdukievič, lider hramadzianskaj kampanii «Havary praŭdu!» Uładzimir Niaklajeŭ, lider hramadzianskaj kampanii «Jeŭrapiejskaja Biełaruś» Andrej Sańnikaŭ, namieśnik staršyni Partyi BNF Ryhor Kastusioŭ, sustaršynia arhkamiteta pa stvareńni partyi «Biełaruskaja chryścijanskaja demakratyja» Vital Rymašeŭski, namieśnik staršyni Biełaruskaj partyi «Zialonyja» Juryj Hłušakoŭ, namieśnik staršyni Abjadnanaj hramadzianskaj partyi Jarasłaŭ Ramančuk, ekanamist Viktar Ciareščanka.
4-ja prezidenckija vybary ŭ Biełarusi projduć 19 śniežnia 2010 hoda.
