Kryžovy pachod dzietak

8 vieraśnia ŭviečary ŭ mienskaj halerei «Ŭ» budzie prezentavanaja «Bojnia № 5, abo kryžovy pachod dzietak». Hety ŭsiaśvietna viadomy raman amerykanskaha piśmieńnika Kurta Vonehuta pierastvaryŭ pa-biełarusku Pavał Kaściukievič.

Kniha vyjšła ŭ pryvatnym vydaviectvie «Łohvinaŭ» pad hryfam «Biblijateka Baćkaŭščyny».

«Bojnia № 5» pryvabiła miljony čytačoŭ uva ŭsim śviecie svaim svabodalubnym źmiestam. Niezdarma jaje adrazu pa vychadzie ŭ siaredzinie 60-ch hadoŭ minułaha stahodździa sprabavali zabaranić navat tam, dzie, zdavałasia b, ničoha zabaranić niemahčyma, — na radzimie vydańnia, u ZŠA. Aŭtar naležyć da taho koła buntoŭnych amerykanskich piśmieńnikaŭ, imiony jakich siońnia narešcie źjaŭlajucca na vokładkach biełaruskamoŭnych vydańniaŭ dziakujučy maładoj hieneracyi ajčynnych pierakładčykaŭ.

Tamu siońniašniaja viečaryna ŭ halerei «Ŭ», — kaža Pavał Kaściukievič, — heta nia tolki prezentacyja pierakładzienaj im knihi:

«Heta budzie nia tolki i nia stolki impreza, pryśviečanaja Kurtu Vonehutu i jaho ramanu, heta budzie svojeasablivy trybjut, danina pavahi ŭsioj amerykanskaj litaratury, a dakładniej litaratury pra Ameryku.

My zhadajem amerykanskich litaraturnych buntaroŭ, prynamsi bolšaść ź ich pačynajučy z Čaka Pałanika. Uryŭki ź jaho ramanu „Bajcoŭski klub“ pračytaje pierakładčyk Siaržuk Miadźviedzieŭ. My zhadajem taksama vieršy paeta-bitnika Alena Hinzberha ŭ pierakładzie Juli Cimafiejevaj».

Vieršy ž kanadzkaha paeta Leanarda Koena prahučać jak pieśni ŭ vykanańni pierakładčyka Andreja Chadanoviča.

Što ž da ŭłasna prezentavanaha pierakładu «Bojni № 5», to jon budzie pradstaŭleny nia tolki čytańniem tekstavych frahmentaŭ, ale i videašeraham. Na viečarynie buduć demanstravacca ź biełaruskimi tytrami frahmenty filmu pavodle «Bojni № 5», źniataha ŭ ZŠA ŭ 1971 hodzie.

Pačatak vialikaj biełaruska-amerykanskaj litaraturnaj viečaryny ŭ halerei «Ŭ» — a 18-j hadzinie.

svaboda.org

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH